Ձեր վստահելի աղբյուրը

«Լուսավոր Հայաստանը»  կրկին երրորդ ուժն է լինելու խորհրդարանում: Քարոզարշավի ընթացքում լրագրողների հետ ճեպազրույցում ասաց «Լուսավոր Հայաստան» կուսակցության առաջնորդ, կուսակցության ցուցակը գլխավորող Էդմոն Մարուքյանը:

«Ես տոկոս չեմ կարող ասել, քվեարկությունից դա կերևա, բայց զարգացումներն այդ ուղղությամբ են գնում»,- նշեց նա:

Հարցին՝ եթե ԼՀԿ-ն չանցնի խորհրդարան, հունիսի 21-ին փողո՞ց է դուրս գալու, Է. Մարուքյանը պատասխանեց. «Ինչի՞ համար: Այսինքն փողոց են դուրս գալիս նրանք, որոնք չե՞ն անցնում: Չանցնելու տարբերակ չկա: Փողոց դուրս գալու տարբերակ կարող է լինել մեկ դեպքում, եթե օրինակ, ընտրությունները կեղծվում են, եթե, օրինակ, արհավիրք է տեղի ունենում երկրում:

«Լուսավոր Հայաստանը» հիմա հանդես է գալիս փողոց ընդհանրապես դուրս գալը բացառելու համատեքստում: Եթե մենք բոլորին համախմբելու, համերաշխության կոչերով գալիս ենք, ի՞նչ փողոց: Մենք փողոցները, խորհրդարանի մուտքերն ազատել ենք արտահերթ ընտրություններ նշանակելով»:

Նա ընդգծեց՝ ժողովուրդն ուզում է և պարտադրում է համախմբում, ժողովուրդը չի հարցնում՝ սրան ես սիրում, թե  չես սիրում, ժողովուրդն ասում է՝ համախմբվենք, «հերիք ու բոլ եղավ, երկիրն ունի ավելի մեծ մարտահրավերներ, քան ձեր ներքին խնդիրներն են»:

«Մարդիկ ուղղակի չեն կարողանում հանդուրժել այս ամենը: Երկիրը հազար խնդիր ունի,  մարտահրավերներ, մարդիկ ուղում են հավաքվեն բոլորով ու խնդիրները լուծեն: Մենք անում ենք  մարդկանց ուզածը»,- ասաց Է.Մարուքյանը:

Ըստ նրա, «Լուսավոր Հայաստանը» միակ ուժն է, որը չարտագաղթելու պլան է ներկայացրել, դա համերաշխությունն է, մյուս բոլոր պլաններն արտագաղթելու մասին են: