Ձեր վստահելի աղբյուրը

«Սա քաղաքական գործընթաց է՝ ուղղորդված երկրի ղեկավարի աթոռից կառչած Փաշինյանի կողմից»,-Երևանի ընդհանուր իրավասության դատարանի դիմաց լրագրողների հետ զրույցում հայտարարեց ԱԺ աշխատակազմի նախկին ղեկավար Արա Սաղաթելյանը։

Հիշեցնենք, մինչ դատարանը քննում է հայտնի բժիշկ, պրոֆեսոր, «Հայաստան» դաշինքից պատգամավորության թեկնածու առաջադրված Արմեն Չարչյանի ձերբակալման իրավաչափության բողոքը, դատարանի դիմաց բազմաթիվ մարդիկ են հավաքվել՝ Չարչյանի ձերբակալման դեմ իրենց բողոքի։

«Եվ գործընթացի բաղադրիչները, և այն տեխնիկան, որոնցով դա իրականացվում է, միանշանակ խոսում է այն մասին, որ այս գործընթացն այլ նպատակ չունի, քան ընդդիմության համախոհներին վախեցնելը։ Իրավական առումով էլ առանց փորձաքննության ու այլ գործընթացների որոշվել է ձերբակալել, մինչդեռ վարչական մեծածավալ ռեսուրսների կիրառմամբ Նիկոլի հանրահավաքին մարդիկ են բերում, ու նման գործերն օրերով ուսումասիրվում են։ Ընտրողական արդարադատություն են փորձում իրականացնել։ Սա միանաշանակ տեղավորվում է քաղաքական հետապնդման շրջանակներում»,- ասաց Արա Սաղաթելյանը։

Նա ընդգծեց, այն անձինք, որոնք ներգրավված են այս պրոցեսում շատ շուտով կրելու են ամենախիստ պատասխանատվությունը։

«Ռեժիմը հոգեվարքի մեջ է։ Վերջին օրերին հրավիրել են «Հայաստան» դաշինքի ներկայացուցիչների, «բացատրական» աշխատանքեր են իրականացրել, փորձել են սպառնալ, «Պատիվ ունեմ»-ի ներկայացուցիչների նկատամամբ տարբեր մարզերում փորձում են ճնշումների ենթարկել, սպառնալ, վախեցնել։ Ընդդիմության ակտիվության վրա սա որևէ կերպ չի ազդելու, և ես վստահ եմ, որ մարդիկ կատարելու են իրենց ընտրությունը, և մենք ազատվելու ենք այս փնթի, պետությունն իրենց խաղալիքը դարձրած, իշխանության հանկարծակի եկած մարդկանցից»,- նշեց նա։

Հիշեցնենք, որ Արմեն Չարչյանի պաշտպաններ Էրիկ Ալեքսանյանն ու Արամ Վարդևանյանը ձերբակալման որոշումն ապօրինի են որակում՝ նշելով, որ դրա հիմք հանդիսացած ձայնագրության մեջ Չարչյանի խոսքում որևէ հանցակազմ չկա։ Պրոֆեսոր Արմեն Չարչյանի ձերբակալման դեմ պաշտպանների բողոքը մակագրվել է Ավան նստավայրի դատավոր Մանվել Շահվերդյանին։