Ձեր վստահելի աղբյուրը

Երևանի ընդհանուր իրավասության դատարանի Ավանի նստավայրում ավարտվել է «Իզմիրլյան» բժշկական կենտրոնի ղեկավար Արմեն Չարչյանի ձերբակալման իրավաչափության հարցի քննությունը, որոշումը կհրապարակվի ժամը 20։00-ին։ Դատարանի մոտ լրագրողներին ասաց Արմեն Չարչյանի պաշտպան Էրիկ Ալեքսանյանը։

Նա հայտնեց, որ քննիչն ու դատախազը չէին ներկայացել դատական նիստին, համապատասխան դիմում էին ներկայացրել՝ խնդրելով դատական նիստը հետաձգել։

«Մեր դիրքորոշումն այնպիսին էր, որ քննիչի դիմումը եղել է անհարգելի, խնդրեցինք դատարանին շարունակել նիստը։ Դատարանը մեր խնդրանքը բավարարեց, փաստացի ունենք այն իրավիճակը, որ քննությունը շարունակվեց վերջիններիս բացակայությամբ»,- ասաց պաշտպանը։

Է. Ալեքսանյանի խոսքով, իրենք ներկայացրել են իրենց համապատասխան փաստարկները. «Գործ ունենք բացառապես քաղաքական հետապնդման հետ, որևէ կերպ չենք կարող խոսել իրավական գործընթացի մասին, քանի որ ձերբակալման այն հիմքը, նպատակները, որոնք  նշված են, առհասարակ աղերս չունեն իրավաբանության հետ»,- ասաց Է. Ալեքսանյանը։

Պաշտպանն ասաց, որպես ձերբակալման հիմք վարույթ իրականացնող մարմինն  ի սկզբանե նշել էր՝ հանցանք կատարելուց անմիջապես հետո Արմեն Չարչյանը բռնվել է։

«Ընտրական օրենսգրքի  90-րդ հոդվածի 5-րդ մասի համաձայն այդ ձերբակալման հիմքը նախատեսում է որպես բացառություն օրենսդրի կողմից անձեռնմխելիության հաղթահարման հարցի տեսանկյունից։ Այսինքն, եթե այդ հիմքն է նշվում, ապա անձեռնմխելիության հաղթահարման հետ քննիչն այլևս խնդիր չունի։ Այստեղ խոսքը գնում է խորամանկության մասին։ Փաստացի նշվել է մի հիմք, որպեսզի քննիչը չունենա այդ անձեռնմխելիությունը զրկելու խնդիր, որպեսզի ավելի հեշտ կարողանան պարոն Չարչյանին ազատությունից զրկել։

Մեր դիրքորոշումը դրա վերաբերյալ եղել է շատ հստակ, կարծում եմ,  հետագայում ընդունելի կլինի դատարանի համար»,- ասաց Է. Ալեքսանյանը։ 

Ինչ վերաբերում է ձերբակալման նպատակներին, ըստ պաշտպանի, քննիչը նշել էր երկու նպատակ, երկրորդն օրենսդրորեն գոյություն չունի. «Առաջին նպատակը փախուստը կանխել։ Մենք նշեցինք, որ վարույթ իրականացնող մարմնի նպատակն իրավաչափ չէ այնքանով,  որքանով պարոն Չարչյանը ոչ մի գործողություն չի կատարել վարույթ իրականացնող մարմնի  տեսադաշտից դուրս գտնվելուն կամ չնկատվելուն, մշտապես գտնվել է Երևանում, որևէ ապօրինի գործողություն չի կատարել։

Երկրորդ նպատակն էր՝ քննությանը խոչընդոտելը։ Կարծես թե քննիչը շփոթել էր ձերբակալման  արձանագրությունը կալանքի՝ որպես խափանման միջոց ընտրելու միջնորդության հետ, քանի որ  քննությանը խոչընդոտելու հիմքը գոյություն ունի միայն խափանման միջոցի տեսանկյունից»։

Էրիկ Ալեքսանյանն ընդգծեց՝ այս ամենը վկայում է  այն մասին, որ գործ ունեն բացառապես քաղաքական հետապնդման հետ, դժվար է պատկերացնել, որ պրոֆեսիոնալ քննիչ է, չգիտի օրենսդրորեն նման նպատակ գոյություն չունի։

«Այս նպատակը զուտ նշվել է նրա համար, որպեսզի ձերբակալման արձանագրությունն այսպես ասած ճոխացնեն։ Բայց եթե իրենք այդպես են մտածում, չարաչար սխալվում են»,- ասաց պաշտպանը։