Ձեր վստահելի աղբյուրը

«Պրոֆեսոր Չարչյանը փրկել է հազարավոր կյանքեր։ Նույն հատուկ քննչական ծառայության, չանձնավորեմ, ներկայացուցիչները երբ դիմել են պրոֆեսոր Չարչյանին, բոլորին այնպես է վերաբերվել, ինչպես մնացած մյուս հազարավորներին»,- Երևանի ընդհանուր իրավասության դատարանի Ավանի նստավայրի դիմաց լրագրողներին ասաց հայտնի բժիշկ, «Իզմիրլյան» ԲԿ տնօրեն, «Հայաստան» դաշինքի ներկայացուցիչ Արմեն Չարչյանի պաշտպան Արամ Վարդևանյանը։

Նա նշեց, որ վերջին շրջանում պրոֆեսորի մոտ կա առողջական խնդիր։

«Ու այդ պայմաններում մարդը մարդասիրության հետ ինչ ճգնաժամի մեջ պետք է լինի, որ իբր թուղթ գրի, մեջն էլ գրի պրոֆեսոր Չարչյանը պետք է փախնի։ Ո՞ւմից պետք է փախուստի դիմի, այն ՀՔԾ-ից, ումից շատերին ինքը բուժում է։ Այստեղ բարոյական իմաստով ճգնաժամ եմ համարում կոնկրետ Հատուկ քննչական ծառայության մասով։

Երկրորդ, չնայած նրան, որ քննիչը շատ լավ գիտեր, որ պրոֆեսորն ունի որոշակի առողջական ռիսկեր, չներկայացավ այսօրվա դատական նիստին՝ ոչ քննիչ, ոչ դատախազ։

Դատախազի չներկայանալը մեկնաբանեմ որպես ՀՔԾ-ից անջատ գործելու մոտեցում, եթե այդպես է՝ դրական եմ գնահատում։

ՀՔԾ-ն նաև գրավոր դիմում էր գրել՝ իբր հիմք ներկայացնելով, որ տապալեին այսօրվա նիստը։

Մարդիկ գիտեն, որ պրոֆեսորն առողջական խնդիր ունի, իրենց հորինած մեղադրանքով տարել են, ՁՊՎ-ում պահել են, ու մի հատ էլ ուզում էին այսօրվա նիստը տապալել»,- ասաց Ա. Վարդևանյանը։

Պաշտպան Էրիկ Ալեքսանյանն ասաց, որ որևէ ստուգողական գործողություն չեն կատարել, վերցրել են, անհայտ աղբյուրի հիման վրա ոչ միայն քրեական գործ են հարուցել, ինչն արդեն անօրինական է, մի հատ էլ քրեական հետապնդում են իրականացնում։

«Վարույթ իրականացնող մարմինը երեկ որոշում է կայացրել դատաձայնագրային փորձաքննություն նշանակելու մասին։ Ի թիվս այլ հարցերի հարց է առաջադրել՝ արդյո՞ք այդ ձայնագրության մեջ խոսող անձը Արմեն Չարչյանն է։

Այսինքն, վարույթ իրականացնող մարմինն անգամ ունի կասկած, որ միգուցե այդ անձը Արման Չարչյանը չէ։ Հարց է առաջանում՝ բա ո՞նց եք քրեական հետապնդում իրականացնում ու անձին ազատությունից զրկում։ Այստեղ տրամաբանական կապը կտրվում է, որը ևս մեկ անգամ վկայում է  այն մասին, որ գործ ունենք բացառապես քաղաքական հետապնդման հետ, գործ ունենք բացառապես ՀՀ երկորդ նախագահ Ռոբերտ Քոչարյանի թիմակիցների նկատմամբ ճնշում գործադրելու հետ ազատ և հավասար ընտրություններին խոչընդոտելու տեսանկյունից»,- ասաց Է. Ալեքսանյանը։

Արամ Վարդևանյանն ասաց, որ «Հայաստան» դաշինքի թիմակիցների նկատմամբ ճնշումների, գործ սարքելու փորձերի մասին արդեն հայտարարություններ արել էր։

«Բոլորը, նաև ՀՔԾ քննիչները, գիտեն, որ սա քաղաքական հետապնդում է»,- ընդգծեց պաշտպանը։

Նա նաև հիշեցրեց ՄԻՊ-ի հայտարարությունը, ըստ որի, ՔՊ պատգամավորի թեկնածուն մարդկանց ստիպելով բերել էր հունիսի 17-ի հանրահավաքին, ապա հարց հնչեցրեց՝ այդ անձը ձերբակալվա՞ծ է.

«Ես տեղեկություն ունեմ, որ ստուգողական գործողություններ են անում։ Երբ այսպիսի տարբերակված է մոտեցումը, չեղա՞վ որ քաղաքական հետապնդում է»,- նշեց Արամ Վարդևանյանը։

Պաշտպաններն ակնկալում են, որ պրոֆեսոր Չարչյանը րոպե առաջ պետք է ազատ արձակվի, այդտեղ երկրորդ տարբերակ չկա:

Հիշեցնենք, որ Երևանի ընդհանուր իրավասության դատարանի Ավանի նստավայրում ավարտվել է է «Իզմիրլյան բժշկական կենտրոն»-ի ղեկավար Արմեն Չարչյանի ձերբակալման իրավաչափության հարցի քննությունը, որոշումը կհարապարակվի ժամը 20։00-ին։