Ձեր վստահելի աղբյուրը

«Այսօր երևի Հայաստանի արդի պատմության մեջ առողջապահական հանրույթի հետ տեղի ունեցող ամենաաղաղակող իրավիճակներից մեկն է։ Ձերբակալվել է  շատ հարգարժան պրոֆեսոր Արմեն Չարչյանը»,- Երևանի ընդհանուր իրավասության դատարանի Ավանի նստավայրի դիմաց  լրագրողների հետ զրույցում ասաց առողջապահական իրավունքի միջազգային կենտրոնի ղեկավար, բժիշկ Սամվել Սողոմոնյանը։

Հիշեցնենք, որ պրոֆեսոր Արմեն Չարչյանի ձերբակալման դեմ պաշտպանների բողոքը մակագրվել է Ավան նստավայրի դատավոր Մանվել Շահվերդյանին։ Չարչյանի պաշտպաններ Էրիկ Ալեքսանյանն ու Արամ Վարդևանյանը ձերբակալման որոշումն ապօրինի են որակում՝ նշելով, որ դրա հիմք հանդիսացած ձայնագրության մեջ Չարչյանի խոսքում որևէ հանցակազմ չկա։

Ս.Սողոմոնյանի գնահատմամբ, այսօր ինչ տեղի է ունենում պրոֆեսորի շուրջ, ունի երկու բաղադրիչ՝ իրավական և մարդկային-բարոյական։

«Ինչ վերաբերում է իրավական բեղադրիչին, ուզում եմ ասել, որ եթե որևէ անհայտ անձի կողմից արված ձայնագրություն տրամադրվում է իրավապահ մարմիններին, նրանց պարտավարությունն է փորձաքննության ենթարկել այդ ձայնագրությունը, հավաստիանալ, որ դրա մեջ ասվածը համապատասխանում է  Արմեն Չարչյանի ձայնին ու մոնտաժված չէ։ Միայն փորձաքննության պատասխանից հետո հնարավոր է  քրեական գործի հարուցում և սանկցիաներ։ Իմ տեղեկություններով, մինչ այս պահը չկան փորձաքննության արդյունքներ և չկա եզրակացություն, որ իրավունք կա կիրառելու այդ ձայնագրությունն որպես ապացույց։

Երկրորդ պատճառը. լավ, դիցուկ քրեական գործ եք հարուցվել Արմեն Չարչյանի հանդեպ, ինչո՞ւ եք ձերբակալում այդ մարդուն, ինչո՞ւ եք այդ հարգարժան պրոֆեսորին ձերբակալում։

Քրեական գործը հարուցեք, քրեական գործով համապատասխան ընթացակարգերով սահմանված ձեր գործողությունները արեք, ինչո՞ւ եք ազատությունից զրկում մի անձի, որը, գոնե իմ աչքի առաջ 44-օրյա պատերազմի ընթացքում ու դրանից հետո, առ այսօր գիշեր-ցերեկ զինվոր է բուժել, մարդկանց կյանքեր է փրկել։ Մարդ, ում անմիջական համակարգմամբ ու կազմակերպմամբ «Իզմիրլյան» բժշկական կենտրոնի բժշկական թիմերը՝ ութ վիրաբուժական մասնագիտացված թիմեր, աշխատում էին հերթափոխով Արցախի զինվորական հոսպիտալներում, Ստեփանակերտի կենտրոնական հիվանդանոցում  ու նման մարդուն այսօր ազատությունից զրկում են ակնհայտ ապօրինի ընթացակարգերով»,- ասաց բժիշկը։

Ս. Սողոմանյանի խոսքով, այսօր ազատությունից զրկված է մարդ, ով Հայաստանում վնասվածքաբանության և օրթոպեդիայի բժշկագիտական դպրոց է  հիմնել, մարդ, ով հազարավոր վիրահատություններ է  կատարել, հազարավոր պացիենտների կյանքի է  վերադարձրել, մարդ, ով տարիներ շարունակ կրթել ու մասնագիտական դաշտ է ճանապարհել մեծաքանակ բժիշկ-մասնագետներ, որոնք այսօր Հայաստանի օրդապեդիական-վնասվածքաբանական  դպրոցի կորիզն են կազմում։

«Նման մարդուն, ով օրեր առաջ սրտի վիրահատություն էր տարել՝ ստենդավորվել էր, շաքարային դիաբետ ուներ, ապօրինի ընթացակարգերով ազատությունից զրկել են, հիմա էլ փորձում են տանել կալանքի։

Ինչ տեղի է ունենում պրոֆեսոր Չարչյանի հետ, ով «Հայաստան» դաշինքով պատգամավորության թեկնածու է, ակնհայտորեն որակում եմ որպես քաղաքական հետապնդում, այլ որակում սրան  պարզապես հնարավոր չէ տալ։

Բոլորը պետք է հստակ գիտակցեն՝ այն, ինչ այսօր կատարվում է պրոֆեսոր Չարչյանի հետ, նրա շուրջ,  ուղղակիորեն հրահանգված է  երկրի վարչապետի  պաշտոնակատար Փաշինյանի կողմից»,- ասաց Ս. Սողոմոնյանը։

Նա նշեց, որ ողջ բժշկական հանրությունը դատապարտում է այն, ինչ կատարվում է պորֆեսոր Չարչյանի հետ, դրա վկայությունն է դատարանի դիմաց հավաքված բժիշկները, դրա ապացույցն է հարյուրավոր ստորագրությունները, որոնք այսօր կարճ ժամանակում հավաքվել են ի պաշտպանություն պրոֆեսոր Չարչյանի։

«Հույս ունեմ Հայաստանում արդարադատությունն իր խոսքը կասի, հույս եմ հայտնում ևս մեկ օր իշխող իշխանական ուժերն ամբողջությամբ չեն կարող իրենց կամքը թելադրել դատական համակարգին, այսօր արդարադատություն տեղի կունենա և քիչ անց կտեսնենք պրոֆեսորին ազատության մեջ»,- ասաց առողջապահական իրավունքի միջազգային կենտրոնի ղեկավար, բժիշկ Սամվել Սողոմոնյանը։