Ձեր վստահելի աղբյուրը

«Մարզերում պատգամավորները, մարզպետները կանգնում են ընտրատեղամասերի դիմաց՝ այդպիսով փորձելով վախեցնել, սպառնալ, հրահանգավորել և ուղղորդել քաղաքացիներին»,- լրագրողների հետ հանդիպման ժամանակ հայտնեց «Պատիվ ունեմ» դաշինքի ներկայացուցիչ Թեհմինա Վարդանյանը և հիշատակեց Ճամբարակի ընտրատեղամասը, որտեղ Նիկոլ Փաշինյանի հայտնի մտերիմը՝ Հայկ Սարգսյանը բռնաճնշումներ է իրականացնում։

Նա հայտարարեց, որ վերջին մեկ շաբաթվա ընթացքում բազմաթիվ հայտարարություններ են տարածել այն մասին, որ «Պատիվ ունեմ» դաշինքի շտաբի ներկայացուցիչներն անօրինական հետապնդվում ու ձերբակալվում են։

«Այսօր առավոտվանից լայնածավալ տեռոր է իրականացվում հիմնականում թեկնածուների  և «Պատիվ ունեմ» դաշինքի շտաբի ներկայացուցիչների վրա, որի նպատակն է խոչընդոտել շտաբի կողմից տարվող աշխատանքները և պարալիզացնել այն։

Թեհմինա Վարդանյանը հայտնեց, որ հատկապես զինվորականների կողմից վարչական լծակների «լկտի և անբարտավան» կիրառում է իրականացվում և հիշատակեց մամուլում հեղեղված 34/10,  34/3, 34/13 տեղամասերում արձանագրված դեպքերը։

«Որոշ խամաճիկային սպաներ տեղամաս մտնելուց առաջ հրահանգում են զինվորներին, որպեսզի գնան և քվեարկեն «կապիտուլյանտ» իշխանությունների օգտին»,- հայտնեց «Պատիվ ունեմ» դաշինքի ներկայացուցիչը։

Նրա խոսքով՝ հիմնականում համար 6՝ «Պատիվ ունեմ» դաշինքի քվեաթերթիկները խոտանված են և փորձում են մեղքը գցել տպարանների վրա։

«Աբովյան 29/20 ընտրատեղամսի դիմաց հայտնաբերել են կնոջ, որն իր ձեռքում ունեցել է ծրար՝ ներսում  համար 3 քվեաթերթիկը և սա փաստում է, որ «կապիտուլյանտը» ինչպես և նախօրոք պատկերացնում էինք, բոլոր հնարավոր միջոցներն օգտագործում է, այդ թվում նաև «կառուսելը»՝ լցոնումները»,- հայտնեց Վարդանյանը և հիշեցրեց, որ նախորդ օրը քվետուփերի վրա տեսել էին նաև անցքեր, որոնցով փորձում են քվեաթերթիկներ գցել արկղը։