Ձեր վստահելի աղբյուրը

Դեռևս վաղ է ընտրությունների արդյունքների մասին խոսելը, բայց կներկայացնենք մի  քանի աղաղակող փաստեր։ Այս մասին ամփոփիչ ասուլիսին ասաց  «Պատիվ ունեմ» դաշինքի պատգամավորի թեկնածու Հայկ Մամիջանյանը։

«Քիչ առաջ խուզարկվել է «Պատիվ ունեմ» դաշինքի թեկնածու Դավիթ Համբարձումյանի բնակարանը, փորձ է արվել խուզարկելու մեքենան։ Հիշեցնեմ, որ Համբարձումյանը չունի որևէ կարգավիճակ և միակը կարգավիճակը դաշինքի պատգամավորի թեկնածու լինելն է։ Սա հերթական անօրինությունն է,որն իրականացվում է իշխանությունների կողմից։ Իրականացնողն ԱԱԾ-ն է և կոչ եմ անում դադարել լինել գործիք այս կապիտուլյանտ , անհայրենիք իշխանությունների ձեռքին»,- հայտարարեց Մամիջանյանը։

Արթիկում տեղի ունեցած  հաջորդ աղաղակող փաստը, Մամիջանյանի փոխանցմամբ՝  «Պատիվ ունեմ» դաշինքի  երկու պատգամավորի  թեկնածուների և շտաբի աշխատակիցների առևանգումն է։

«Տրամադրվել է տվյալ,որ նշված անձիք տեղափոխվելու են Արթիկ քաղաք,բայց ԱԱԾ-ն չի տալիս պարզաբանում իրենց գտնվելու վայրի մասին՝ ոչ Արթիկում, ոչ Գյումրիում։ Սա ընդունեք հաղորդում հանցագործության մասին, քանի որ երկու պատգամավորի թեկնածուներ  և երկու շտաբային աշխատակիցներ այս պահին Արթիկից առևանգված են»,- տեղեկացրեց Մամիջանյանը։

Նրա խոսքով՝ փաստացի նշված անձանց իրավական խորհրդատվություն ստանալու իրավունքը հնարավոր չէ կիրառել,քանի որ գտնվելու վայրի մասին տեղեկություն չկա։

«Այս ամենը տեղի է ունենում այն բանից հետո, որ ԿԸՀ-ն բազմիցս հայտարարեց, որ թեկնածու անձի նկատմամբ բերման ենթարկելը կամ ձերբակալելը կարող է իրականացվել  օրենքով սահմանված գործընթացների և նախապայմանների ապահովման պարագայում»,- ավելացրեց դաշինքի ներկայացուցիչը։

Անդրադառնալով ընտրության օրն արձանագրված այլ խախտումներին ,Մամիջանյանը մասնավորապես հայտնեց, որ հանրապետության զգալի մասը հոսանքազրկված է, ինչը չի կարող լինել պատահականություն։

«Փաստացի հոսանքազրկված է ՀՀ մարզերի զգալի հատվածը՝ Արմավիրը,Գյումրին, Վանաձորը, Տավուշը,  Ապարանը։ Շարունակում ենք ստանալ տվյալներ, որ իշխանություններն իրենց ապօրինի գործունեությունն իրականացնելու համար հոսանքազրկել են  մի շարք այլ մարզեր նույնպես։ Սա չի կարող լինել համընկնում։ Իշխանությունները գիտակցում են, որ արդեն պարտվել են և փորձում են հոսանքազրկումների միջոցով հասնել արդյունքի»,- ասաց նա։

Մամիջանյանի համոզմամբ ՝ 44 օր պատերազմ կեղծած իշխանությունը , պատրաստ կլինի ընտրություն կեղծելու։

«Մեր հասարակությունը մի անգամ «հաղթելու ենք» թեզին խաբվելով վստահաբար չի խաբվելու «հաղթելու ենք 2․0» թեզին։ Ուստի՝ պետք է կոչ անեմ քաղաքացիներին ուշի ուշով հետևել զարգացումներին՝ հոսանքազրկումից մինչև ձերբակալություններ»,- ասաց նա։

Մանրամասն՝ տեսանյութում։