Ձեր վստահելի աղբյուրը

«Ես իմ ընտրությունը կատարել եմ դեռևս 33 տարի առաջ և այսօր էլ իմ վերաբերմունքը չի փոխվել»,- քվեարկելուց հետո լրագրողներին ասաց ՀՀ երրորդ նախագահ, ՀՀԿ նախագահ  Սերժ Սարգսյանը: 

Նա ընդգծեց՝ քվեարկել է հանուն անվտանգ, ինքնիշխան, տնտեսապես զարգացած Հայաստանի և Արցախի Հանրապետությունների, հանուն հզոր հայկական բանակի, հանուն մեր սահմանների անձեռնմխելիության և հանուն մեր հասարակության  հաշտեցման:

Իրավախախտումների վերաբերյալ հարցերին ի պատասխան, Սերժ Սարգսյանն ասաց. «Ողջ  իրավապահ համակարգը, հատկապես քարոզարշավի վերջին օրերին, ակնհայտ հրահանգավորմամբ լծված է մեր դեմ բիրտ ուժ կիրառելուն՝ անգամ անհասկանալի  հրավերներ  բաժիններ, առանց դատարանի որոշման անօրինական խուզարկություններ, անօրինական  ձերբակալություններ, որոնք իրավական ակտերով հաստատվել են և այսպես շարունակ:

Առավոտից ուշադիր հետևում ենք իրադարձություններին, կարծում եմ օրվա երկրորդ կեսին միջանկյալ հայտարարություն կանենք, իսկ հիմնական հայտարարությունը կանենք քվեարկության ավարտից հետո»:

ՀՀ երրորդ նախագահի խոսքով, իրենց համար ամենագլխավոր խնդիրը պառակտված հասարակությանը միավորելն է, այլապես հնարավոր չէ որևէ բանի հասնել՝ ոչ անվտանգության, ոչ տնտեսական զարգացման:

Հարցին, թե «Հայաստան» դաշինքի հետ համագործակցության հնարավորություն տեսնում եք, Սերժ Սարգսյանը պատասխանեց, թե ընտրությունների արդյունքներից հետո դրա մասին կխոսի։

«Հիմա վաղ է խոսել դրա համար»,- նշեց ՀՀ երրորդ նախագահը:

Ինչպես ե՞ք տեսնում ապագան, եթե դարձյալ ընտրվի Նիկոլ Փաշինյանը հարցին ի պատասխան՝ Սերժ Սարգսյանն ասաց.

«Այդ դեպքում ապագա չկա»:

Հիշեցնենք, որ արտահերթ խորհրդարանական ընտրություններին ՀՀԿ-ն «Հայրենիք» կուսկացության հետ հանդես է գալիս «Պատիվ ունեմ» դաշինքով: