Իրանի միջուկային գործարքը` նախագահական ընտրություններից հետո

Քաղաքական 10:45 22/06/2021 Տարածաշրջան

Իրանի միջուկային գործարքը` նախագահական ընտրություններից հետո

Կարծրդիրքային Էբրահիմ Ռայիսին Իրանի նախագահի պաշտոնում ընտրվեց մի քանի օր անց այն բանից հետո, երբ ԱՄՆ նախագահ Ջո Բայդենը հայտարարեց, որ Ռուսաստանի իր պաշտոնակցի հետ քննարկել է Իրանին առնչվող հարցեր: Այս մասին գրում է Ամերիկայի Ձայնը։

«Մեր երկուսի շահերից է բխում, որ Իրանը չունենա միջուկային զենք»,- հայտարարել էր Բայդենը:

Հիշեցնենք, որ ապրիլ ամսին Իրանի հետ սկսվեցին միջուկային հարցերով բանակցությունները՝ վերակենդանացնելու համար 2015 թվականի գործարքը, ըստ որի սահմանափակումներ էին դրվում Իրանի միջուկային գործուներության վրա: Դրա փոխարեն միջազգային համայնքը պարտավորվում էր մեղմել այս երկրի դեմ գործող պատժամիջոցները: Հիշեցնենք, որ Իրանը հրաժարվեց իր այդ պարտավորություններից, երբ նախագահ Թրամփի օրոք ԱՄՆ-ը միակողմանիորեն դուրս բերվեց գործարքից ու Վաշինգտոնը սկսեց պատժամիջոցներ ընդդեմ Թեհրանի:

Այժմ Ավստրիայի մայրաքաղաք Վիեննայում անցկացվող անուղղակի բանակցություններին մասնակցում են ԱՄՆ-ը և նախկին գործարքը կնքած մյուս հինգ պետությունները: Իրանի արտաքին գործերի նախարարը հայտարարել է, որ համաձայնություն հնարավոր է ձեռք բերել մինչև երկրի նախագահի պաշտոնում ընտրված Ռայիսին կստանձնի նախագահի պարտականությունները:

Սպիտակ տան անվտանգության հարցերով խորհրդական Ջեյք Սալիվանն էլ գտնում է, որ չնայած որոշ տարաձայնությունների, ճիշտ ուղղություն է որդեգրվել:

Բանակցողները կիրակի օրը հետաձգեցին բանակցությունների վերջին փուլը` իրենց կառավարությունների հետ խորհրդակցնելու նպատակով: Բանակցությունները վերսկսելու ժամկետ նրանք դեռևս չեն հրապարակել:

Իրանը պնդում է, որ միջուկային իր ծրագիրն ունի զուտ խաղաղ նպատակներ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: