Ձեր վստահելի աղբյուրը

«Ես խորապես համոզված եմ, որ սա մաքուր քաղաքական հիմքով հետապնդում է և իշխանությունը ցույց է տալիս իր ձեռագիրն ու մոտեցումը, ինչը չի էլ թաքցրել»,- դատարանի դիմաց հայտնեց «Հայաստան» դաշինքի անդամ Լիլիթ Գալստյանը՝ մեկնաբանելով հայտնի վիրաբույժ Արմեն Չարչյանի դեմ իրականացվող գործընթացը և հավելեց, որ սա քաղաքական հակառակորդների նկատմամբ հաշվեհարդար տեսնելու ձեռագիր է:

Նա հավաստիացրեց, որ «Հայաստան» դաշինքն իշխանությունների այդ վարքագծի առաջ չի ընկրկելու, առավել ևս՝ նահանջելու:

Լիլիթ Գալստյանը շեշտեց, որ դաշինքին հաջողվել է 21 %-ի ճեղքում իրականացնել և հավելեց, որ պետականության փրկության իրենց օրակարգը մնում է նույնը և հայ ժողովրդի ապագա գնալիք ճանապարհը, ազգայինի պահպանումը մնալու են քաղաքական գործողությունների թիրախում:

Նկատելով, որ քաղաքացիների մոտ հուսահատության և հոռետեսության ալիք է տեսնում՝ «Հայաստան» դաշինքի անդամը հայտարարեց. «Ես պետք է խնդրեմ և հորդորեմ, որ երբեք չհուսահատվեն և ընկրկեն, սա ճեղքումի առաջին քայլերն է, և ինչպես երեկ Սեյրան Օհանյանը շատ դիպուկ ասաց, ընդդիմությունն առաջին խրամատը գրավել է, պետք է այն ամրացնել և գնալ առաջ»:

Գալստյանը համոզմունք հայտնեց, որ հավաքական ժողովուրդը պարտվելու իրավունք չունի և պետք է ամրապնդել ձեռքբերումը՝ շարունակելով ընթացքը:

«Այսօր նրանց թիմից մեկը, Էուարդ Աղաջանյան անունով ինտելեկտուալ գաճաճը փորձել էր պիտակավորել ընդդիմությանը, ասելով՝ ինտելեկտուալ իդիոտները պարտվեցին»,- նշեց Լիլիթ Գալստյանը՝ անդրադառնալով Աղաջանանի ֆեյսբուքյան գրառմանը։ Նա ասաց, որ կարող էր չանդրադառնալ այդ հայտարարությանը, բայց անում է դա, քանի որ համոզված է, որ դա իշխանության ամբողջ թիմի մտածելակերպն է և նրանց արժեքային համակարգը:

«Այսպես են նրանք վերաբերում մեր ազգային արժեքներին, պետականության ինստիտուտներին, ժողովրդի ստվար զանգվածին»,- ասաց Լիլիթ Գալստյանը

Նա անակնկալ չհամարեց իշխանությունների նման վարքագիծը՝ լավ իմանալով, որ դիմելու էին պայքարի բոլոր ձևերին, նաև՝ բռնությանը:

«Պատճառներից մեկը, որ մենք դիմելու ենք Սահմանադրական դատարան, լինելու է այն ձևակերպումը, որ նրանք ողջ ընտրական մթնոլորտն ահաբեկումներով էին լցնում, աշխատանքից ազատելու սպառնալիքներ կիրառում: Ես նաև մանրամասներ գիտեմ, որ իմ ծանոթները և բարեկամները, որոնք ստորագրել էին մտավորականների կոչի տակ, նրանք աշխատավայրում թիրախավորումների շրջագծում են հայտնվել»,- հայտնեց «Հայաստան» դաշինքի անդամը: