Ձեր վստահելի աղբյուրը

Արայիկ Հարությունյանի հրաժարականը պահանջող քաղաքացիներն այսօր նույնպես բողոքի ակցիա իրականացրեցին Ստեփանակերտի հրապարակում։ Այս անգամ նրանք ունեն հստակ տեսլական, թե ինչ է լինելու Հարությունյանի հրաժարականից հետո։

«Նոր իշխանություն պետք է ձևավորվի՝ ընտրության միջոցով։ Արցախում հաջորդ իշխանությունը որոշելու է ժողովուրդը»,- հայտարարեց բողոքի ակցիայի նախաձեռնողներից մեկը։

Երիտասարդ արցախցու պատկերացմամբ՝ պետք է ստեղծվի կոմիտե, որի անդամները չեն լինելու հին իշխանության ներկայացուցիչներ կամ սանիկ-բարեկամներ։ Կոմիտեն պետք է համալրվի Արցախում հարգանք և պատիվ ունեցող մարդկանցով, որոնք կլինեն ազատ և արդար ընտրության երաշխավորը։

Արցախցին նկատեց, որ պատերազմից հետո երկրում իրավիճակ է փոխվել։

«Այն հարցերը, որոնք վերաբերում են Արցախի ստասուսին, պետք է լինենք զգույշ»,- ասաց նա և սկսեց հիմնավորել Արայիկ Հարությունյանի հրաժարականի պահանջը․

«Այսօրվա դրությամբ Արայիկ Հարությունյանը հանդիպում է Ադրբեջանի ԱԱԾ-ի պետի հետ և գաղտնի քննարկումներ ունենում։ Ասում է՝ դա իմ լիազորությունների մեջ է, որպես՝ գերագույն հրամանատար։ Մենք ոնց կարող ենք սուտասան Արայիկ Հարությունյանին վստահել մեր երկրի կարևորագույն հարցերը, մեր ապագայի լինել-չլինելը»,- ասաց նա, որին հետևեցին հանրահավաքի մասնակիցների վանկարկումները՝ «Ազատ, անկախ Արցախ»։ 

Նա հավելեց, որ միանում են Ա. Հարությունյանի հրաժարականի պահանջին. «Մենք ասում ենք, որ հաջորդ իշխանությունը որոշելու է ժողովուրդը և ներկա ու նախկին չինովնիկներ չփորձեն քթները խոթեն»։

Մանրամասները՝ տեսանյութում։