Ձեր վստահելի աղբյուրը

«Սա այս իշխանությունների ձեռագիրն է: Արմեն Չարչյանի պես մարդուն, ով իր ողջ կյանքում կյանքեր է փրկել, հասարակության մեջ հարգված մարդ, կեղծ մեղադրանքով փորձում են գնալ ճնշումների»,- Երևան քաղաքի ընդհանուր իրավասության դատարանի Ավան նստավայրի մոտ լրագրողների հետ զրույցում ասաց «Հայաստան» դաշինքի առաջնորդներից ՀՅԴ ԳՄ ներկայացուցիչ Իշխան Սաղաթելյանը:

Դատարանը քննում է հայտնի բժիշկ, «Իզմիրլյան» ԲԿ տնօրեն, «Հայաստան» դաշինքի ներկայացուցիչ Արմեն Չարչյանի նկատմամբ կալանավորումը որպես խափանման միջոց ընտրելու վերաբերյալ քննիչի միջնորդությունը:

Ի. Սաղաթելյանի խոսքով, այն մեղադրանքը, որն այսօր փորձում են պնդել, եթե համապատասխան օրենքը լիարժեք կիրառեն ու արդար, իրենց մարզպետները պետք է  ցմահ ազատազրկվեն այն ճնշումների համար, որոնք գործադրել են դպրոցի տնօրենների, համայնքի ղեկավարների, տարբեր հիմնարկների ղեկավարների նկատմամբ:

«Իսկ ընդամենը մի կոչ, որ գնացեք ընտրություններին և ներկայացնելով երկրի վիճակը՝ ասելով, որ սա հայրենքի փրկության ընտրություն է, դրա համար վաստակ ունեցող պրոֆեսորին քաշ տալ դատարան, այս իշխանության հերթական սրիկայությունն է»,- նշեց նա:

Ըստ  Իշխան Սաղաթելյանի, այս քայլով իշխանությունն ուզում է վախեցնել. «Այն, որ մուրճը վերցրել էր ձեռքը, ընկել էր փողոցներն ու ասում էր օրենքի դիկտատուրա պետք է լինի, իր նպատակը դա չէ: Իր նպատակն է Նիկոլի դիկտատուրա հաստատելը երկրում, մեկ անձի բռնապետություն հաստատելն է, որը մենք թույլ չենք տալու:

Իհարկե, սա սկիզբն է, փորձելու է լրատվամիջոցներին, ընդդիմադիրներին լռեցնել, այն համայնքների ղեկավարներին, գործարարներին, որոնք իր հետ չեն:

Իր ձեռքը ճար լինի այն 270 հազար մարդուն, ով մեզ քվե է տվել, դրանց բոլորին կկալանավորի: Սա է այս մարդու տեսակը: Կարծում եմ՝ որևէ մեկի համար նորություն չէ: Մեր խնդիրն է սա թույլ չտալ ու թույլ չենք տալու:

Բոլոր հնարավոր միջոցներով պայքարելու ենք այս իշխանության դեմ և մեր մոտեցումների ու կեցվածքների մեջ ոչինչ չի փոխվել:

Այո, այս իշխանության վերարտադրությունը վտանգ է մեր պետականության համար»:

Նա նշեց, որ դեռ հույս ունեն՝ այս ամեն ինչի խորությունը կհասկանան և ճիշտ որոշում կկայացնեն, չնայած ակնհայտ է, որ դատարանի վրա ճնշումներ են գործադրում: 

«Քանի որ իրավական որևէ հիմք չունի այս գործը, հույս ունենք՝ արդար որոշում կկայացնեն»,- ասաց Իշխան Սաղաթելյանը: