Մեր վերաբերմունքը Փաշինյանին լինելու է հայելային. Վանեցյան

Քաղաքական 13:48 23/06/2021 Հայաստան

Մեր վերաբերմունքը Փաշինյանին լինելու է հայելային. Վանեցյան

«Պատիվ ունեմ» դաշինքի ղեկավար, «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը հունիսի 21-ին Հանրապետության հրապարակում Նիկոլ Փաշինյանի ունեցած ելույթում չի տեսել համերաշխության հստակ կոչ և ցանկություն:

«Ես տեսա նույն սպառնալիքների տարափ՝ ուղղակի ձևակերպված ավելի մեղմ ու ավելի գեղեցիկ բառերով: Չես կարող համերաշխության կոչ անել ու միաժամանակ ասել՝ մեկ է բոլորին պառկեցնելու ենք, նստեցնելու ենք, այն ենք անելու, այն ենք անելու: Խոսքերին հավատալ չեմ ուզում և չեմ կարող», - ասուլիսում ասաց Ա. Վանեցյանը:

Ըստ նրա, եթե Նիկոլ Փաշինյանն իրապես հասարակության մեջ համերաշխություն է ուզում, հանգստություն մեր երկրին, ապա նա իր քայլերով ու գործողություններով պետք է շատ կարճ ժամանակահատվածում ցույց տա, որ ինքը փոխվել է:

«Նիկոլ Փաշինյանի իշխանության երեք տարիների ընթացքում արած հայտարարությունները, կոչերն ու իրողությունը էապես տարբերվել են իրարից: Եթե կփորձի երկրին համերաշխություն, հանգստություն բերել, ես միայն ուրախ կլինեմ: Դա ժամանակը ցույց կա: Մեր վերաբերմունքը Փաշինյանին լինելու է հայելային: Եթե տեսնենք, որ նա կարողանում է փոխվել, դառնալ իրապես պետական գործիչ, որին ես անկեղծ չեմ հավատում, ապա, իհարկե, մենք պետք է հասկանանք, իրողություններն ընդունենք և գործենք այլ տրամաբանությամբ», - ասաց Արթուր Վանեցյանը:

Նա նշեց՝ հստակ ընդդիմադիր դաշտում գործող քաղաքական ուժ են, բայց դա չի նշանակում, որ պետք է լինեն փաստացի իշխանությունների հետ թշնամության մեջ:

«Թշնամիներ երկրի ներսում որևէ մեկը պետք է չփնտրի ու չունենա: Կրկնում եմ՝ հայելային վերաբերմունք է լինելու: Եկեք խոսքերին չհավատանք, սպասենք գործողություններին»,- ասաց ընդդիմադիր գործիչը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: