Ձեր վստահելի աղբյուրը

«Եթե ի վերջո որոշում կայացնենք գնալ խորհրդարան, միանշանակ  օգտագործելու ենք խորհրդարանում մեր լծակները, հնարավորությունները, զբավելու ենք թե գերիների, թե անվտանգային համակարգի վերականգնման հարցով»,- ասուլիսում ասաց «Պատիվ ունեմ» դաշինքի ղեկավար, «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը:

Նա նշեց, որ թե Հայրենիքի փրկության շարժման ժամանակ, թե քարոզարշավի ընթացքում հայտարարել էին՝ իշխանության գալու դեպքում իրենց առաջնային հարցերը լինելու են երկուսը՝ անվտանգային համակարգի արագ վերականգնում, սահմանների պահպանության ապահովում և գերիների վերադարձ:

Ինչ վերաբերում է այս իշխանությունների քայլերին գերիների վերադարձի ուղղությամբ, Ա. Վանեցյանն ասաց. «Դուք տեսաք, որ նախընտրական քարոզչության վերջին շաբաթվա ընթացքում Փաշինյանը վերադարձրեց գերիների 15 հոգանոց խումբ ականապատ տարածքների քարտեզների փոխանակման պայմանով:

Հիմա հարց է առաջանում՝ եթե այդ քարտեզները կարող էին տալ ադրբեջանցիներին ու վերադարձնեին գերիներին, օրինակ, վեց ամիս առաջ, ինչո՞ւ չեն արել այդ քայլը:

Ընդ որում, ռուսական կողմից մամուլում հայտարարություն եղավ, որը չհերքվեց, գեներալ Մուրադովը Հայաստանի իշխանություններից ուզել է այդ քարտեզները, Հայաստանի Զինված ուժերն ասել են, որ բնության մեջ նման քարտեզ գոյություն չունի: Մուրադովն ասել է՝ այդ քարտեզների վերադարձի պայմանով նա կարող է վերադարձնել Ադրբեջանում գտնվող բոլոր հայ գերիներին:

Այսինքն՝ այս իշխանություններն իրենց այս քայլով չեն փորձել լուծել գերիների վերադարձի ամբողջական հարցը, այլ պահի տակ ռեյտինգ ավելացնելու հարց են լուծել»,- ասաց Արթուր Վանեցյանը: