Ձեր վստահելի աղբյուրը

Ազգային արխիվի նախկին տնօրեն Ամատունի Վիրաբյանի համար սպասելի էր ՀՀ վերաքննիչ քաղաքացիական դատարանի որոշումը, որի համաձայն մերժվել է ՀՀ արդարադատության նախարար Ռուստամ Բադասյանի անունից ներկայացրած վերաքննիչ բողոքը և Երևան քաղաքի ընդհանուր իրավասության դատարանի 2021 թ. հունվարի 15-ի վճիռը մնացել անփոփոխ։

«Իհարկե, սպասելի էր, որովհետև ես ճիշտն եմ, մարդուն այդ ձևով չի կարելի ազատել աշխատանքից: Կանչում են, սկզբում ասում՝ դիմում գրի, հրաժարվում ես գրել, հնարում են հարկ չվաճարելն ու ազատում: Ո՞նց կարող է պետական հիմնարկը հարկ չվճարի»,- Panorama.am-ի հետ զրույցում ասաց Ամատունի Վիրաբյանը:

Իսկ թե ինչո՞վ է բացատրում արդարադատության նախարարության նման գործելաոճը, արխիվի նախկին տնօրենն ասաց. «Ինչպես ասած՝ իրենց սրտի ուզած տնօրենը չէի»:

Հիմա Ազգային արխիվն ունի տնօրեն: Ա. Վիրաբյանը ենթադրում է, որ այդ տնօրենն իրենց սրտի ուզածն է:

«Նոր մարդ է, արխիվի հետ կապ չունեցող մարդ է»,- ասաց նա:

Հիշեցնենք, որ Երևանի ընդհանուր իրավասության դատարանը բավարարել էր Ազգային արխիվի նախկին տնօրեն Ամատունի Վիրաբյանի հայցը՝ անվավեր ճանաչել նրան պաշտոնից ազատելու ՀՀ արդարադատության նախարար Ռուստամ Բադասյանի՝ 2020 թ. սեպտեմբերի 7-ի հրամանը, վերականգնել նախկին աշխատանքի, բռնագանձել հարկադիր պարապուրդի գումարը: Այս վճռի հրապարակումից հետո ՀՀ արդարադատության նախարար Ռուստամ Բադասյանի անունից վերաքննիչ բողոք էր տարվել:

Վերաքննիչ դատարանի որոշումն ուժի մեջ է մտնում մեկ ամսից:  Ա. Վիրաբյանը չի բացառում, որ կարող է արդարադատության նախարարությունը վճռաբեկ բողոք ներկայացնել, այդ իսկ պատճառով չի կարող հիմա պատասխանել՝ արդյո՞ք կվերադառնա նախկին աշխատանքի, թէ՞ ոչ:

«Կարող է վճռաբեկ բողոք ներկայացնի, չգիտեմ՝ դրա քննությունը ինչքան կտևի, միգուցե վեց ամիս կամ ավելի: Չեմ կարող ասել, ժամանակներն անհասկանալի են»,- ասաց Ամատունի Վիրաբյանը:

2020 թվականի դեկտեմբերի 18-ից «Հայաստանի ազգային արխիվ» պետական ոչ առևտրային կազմակերպության տնօրենն է Գրիգոր Արշակյանը: Նա այդ պաշտոնում նշանակվել է արդարադատության նախարար Ռուստամ Բադասյանի հրամանով: