Ձեր վստահելի աղբյուրը

«Փակվում են հարյուրավոր խանութներ, անհավասար մրցակցության զոհն են դառնում փոքր ու միջին բիզնեսի ներկայացուցիչները, աշակերտներ չլինելու պատճառով փակվում են դպրոցներ, հազարավոր երեխաներ սոված են քնում: Ի՞նչ է, գործող Սահմանադրությո՞ւնն մեղավոր այս ամենի համար», -այսօր Ազգային ժողովում հայտարարությունների ժամին ասաց ԱԺ «Օրինաց երկիր» խմբակցության քարտուղար Հովհաննես Մարգարյանը:

Նրա կարծիքով, այս ու այլ մի շարք խնդիրների լուծումը Սահամանդրության փոփոխությունը չէ: Բայց ամեն դեպքում, փոփոխությունների գործընթացը սկսվել է, ու «Օրինաց երկիրը» անտարբեր չէր կարող լինել դրա նկատմամբ:

««Օրինաց երկիրը» և Հայկական Վերածնունդ միավորումը ներկայացրել է մի շարք առաջարկություններ, որ սահմանադրորեն պաշտպանվի ոչ միայն մասնավոր, այլ նաև պետական համայնքային սեփականությունը, երկրի ընդերքը համարվի բացառիկ սեփականություն: Մեզ հաջողվեց ինքնաբուխ հավաքների համար իրազեկումը հանվի, նախագահի ընտրության համար ընտրիչների ինստիտուտը հանվեց և սահմանվեց ընտրության 3 քառորդի շեմը, ինչը հնարավորինս կբարձրացնի նախագահի լեգիտիմությունը, համամասնական ընտրակարգ կլինի և խորհրդարան մուտք կգործեն ոչ թե թաղային հեղինակությունները, այլ քաղաքական»,-հայտարարեց Մարգարյանը՝ նկատելով, որ չնայած այս ամենին մի շարք սկզբունքային առաջարկություններ այնուամենայնիվ, Սահմանադրական բարեփոխումների մասնագիտական հանձնաժողովը ընդունելի չի համարել: