Ձեր վստահելի աղբյուրը

ՀՀ կառավարության մոտ երեկ գիշերվանից բողոքի ակցիա են իրականացնում գերեվարված զինծառայողնրի հարազատները՝ պահանջելով ՀՀ իշխանություններից Ադրբեջանի դիմաց պահանջ դնել՝ անհապաղ դադարեցնել հայ գերիների նկատմամբ կեղծ դատավարությունը և վերադարձնել Հայաստան առանց նախապայմանների։

Լրագրողների հետ զրույցում Ադրբեջանի կողմից գերեվարված Մելս Ամբարդարյանի եղբայրը՝ Տիգրան Ամբարդարյանն ասաց, որ իրենց բողոքի ակցիան ուղղված է ՀՀ կառավորությանը, միջազգային կառույցներին, նպատակն է՝ առանց որևէ նախապայմանի հասնել հայ գերիների վերադարձին հայրենիք:

«Հիմա ենք որոշել կազմակերպել ակցիան, քանի որ Ադրբեջանում ընթանում է  անօրինական դատավարություններ, որտեղ մեր տղաներին մեղադրում են ահաբեկչությունների մեջ, սպառնում են երկար տարիների ազատազրկում:

Այդ ամենի դեմ պետք է պայաքրել:

Հայաստանը պետք է անհապաղ իրավաբանական գործընթաց սկսի այն հարցի վերաբերյալ, որ Ադրբեջանը չի հետևում Ժնևյան կոնվենցիային:

Միջազգային հանրությունից պահանջում ենք, որպեսզի դիտորդներ ուղարկեն ադրբեջանական դատարան, հետևեն դատավարության ընթացքին,  որպեսզի Ադրբեջանը մեր տղաներին չդատի այնպես, ինչպես ուզում է»,- ասաց Տիգրան Ամբարդարյանը:

Հարցին՝ երեկ հանդիպել եք Նիկոլ Փաշինյանի հետ, արյո՞ք որևէ հարցի պատասխան չեք ստացել, որևէ հուսադրող քայլ չի՞ լինելու, նա պատասխանեց. «Չեմ մանրամասնի հանդիպման բուն իմաստը: Մեզ հետաքրքրող մեկ հարց կա՝ ե՞րբ կվերադառնան մեր տղաները, որի պատասխանը Հայաստանի այսօրվա իշխանությունները չունեն: Դրա համար մենք որոշել ենք ի լուր աշխարհի պայքարենք այդ  ամեն ինչի դեմ»:

Նա հույս ունի, որ իրենց բողոքի ակցիան ու նստացույցը արդյուն կունենա:

Գերեվարված տղաներից մեկի մայրն ասաց, որ 7 ամիս որդին գերի է, հունիսի 16-ին եղել է առաջին դատավարությունը, վաղը երկրորդն դատավարությունն է լինելու.

«Այնտեղ չունի փաստաբան, չգիտենք՝ թարգմանիչն ինչպես է թարգմանում: Մեր պահանջն է կառավարությանը՝ պաշտպանի իր քաղաքացու շահերը, օր առաջ ետ վերադարձնի Ադրբեջանից մեր տղաներին. եթե զինվորը պահել է իր հողը, հայրենիքը, իսկ իրենք այսօր այս կյանքը վայելում են մեր տղաների հաշվին, ուրեմն պարտավոր են պաշտպանել իրենց քաղաքացու շահերը»:

Գերեվարված տղաներից մեկի հայրն ասաց. «Այդ երեխաները բոլորի համար էին գնացել: Թող ամբողջ աշխարհն իմանա, որ մենք տեռորիստ տղաներ չենք տվել, որ Բաքուն որպես ահաբեկիչ է դատում: Իմ խնդրանքն է կառավարությանը կամ մի էակ կա՞, որ մեր երեխեքին բերեն, հասցնեն մեզ»: