Ձեր վստահելի աղբյուրը

«Էբրահիմ Ռայիսիին նախագահ ընտրվելուց հետո իր առաջին մամուլի ասուլիսի ժամանակ հայտարարել է, որ դեմ չէ Վիեննայի բանակցություններին և իր արտաքին քաղաքական առաջնահերթությունը տարածաշրջանն է լինելու, ինչպես նաև ԻԻՀ հարևանների հետ հարաբերությունները։ Ընդհանուր առմամբ նշվում է, որ Է․ Ռայիսիի օրոք Իրանի արտաքին քաղաքականությունում զգալի փոփոխություններ չեն լինելու, սակայն նրա կառավարության կազմում գերակա են լինելու պահպանողական գործիչները»,-այս մասին գրել է իրանագետ Գարիկ Միսակյանը։

Նշվում է, որ ներկա պահին ԻԻՀ ԱԳ նախարարի հիմնական թեկնածու է համարվում Ալի Բաղերի-Քանին, ով ԻԻՀ դատական համակարգում եղել է Է․Ռայիսիի միջազգային հարցերով առաջին խորհրդականը։ Ա․Բաղերի-Քանին Մահմուդ Ահմադինեժադի կառավարման շրջանում եղել է ԻԻՀ ԱԱԲԽ գլխավոր քարտուղարի արտաքին քաղաքական և միջազգային անվտանգության հարցերով տեղակալ, ինչպես նաև Սայիդ Ջալիի հետ միասին եղել է միջուկային ծրագրի բանակցող խմբի գլխավոր անդամներից և ԻԻՀ ԱԳՆ կենտրոնական և հյուսիսային Եվրոպայի բաժնի պետ։

«Ալի Բաղերի-Քանին ԻԻՀ Բանիմացների խորհրդի նախկին անդամ Մոհմամմադ Բաղերի-Քանիի որդին և ԻԻՀ Հոգևոր առաջնորդ Ալի Խամենիի՝ փեսա Մեսբահ-օլ Հադի Բաղերի-Քանիի եղբայրն է։ Մոհմմադ Բաղերի-Քանին և Մոհմմադռեզա Մահդավի-Քանին եղել են ԻԻՀ ամենաազդեցիկ հոգևորականներից։ Վերջին տարիներին Քանի ընտանիքը ղեկավարում է Իրանի ամենաազդեցիկ համալսարաններից մեկը՝ «Էմամ Սաղեղ համալսարանը», որը Իրանի քաղաքական, անվտանգային և գաղափարական կյանքում մեծ դերակատարություն ունի։

Ալի Բաղերի-Քանին հանդիսանում է Իսլամական հեղափոխության ոչ հոգևորական երկրորդ սերնդի ամենաազդեցիկ ներկայացուցիչներից, ով չնայած ունի պահպանողական հայացքներ, սակայն համարվում է իրանական ազգայնականության նոր փիլիսոփայական դպրոցի ներկայացուցիչ»,-գրում է իրանագետը։