Ձեր վստահելի աղբյուրը

Պրոֆեսոր Արմեն Չարչյանի ընդունարանի դիմաց տասնյակ մարդիկ նրա են սպասում։ Լրագրողների հետ զրույցում ասաց ԵՊԲՀ դասախոս Ս. Սահակյանը, ով մասնակցում է հայտնի բժիշկ, «Իզմիրլյան» բժշկական կենտրոնի ղեկավար Արմեն Չարչյանին ազատ արձակելու պահանջով ակցիային։

«Այսօր 30 հոգի նստած սպասում են և այդպես էլ չկարողացան հասկանալ, թե պրոֆեսոր Չարչյանն ինչպես կարող է մերժել ու իրենց չվիրահատել։ Իհարկե, փորձեցինք բացատրել, փորձեցինք հասկացնել, բայց եթե ես էլ իրենց տեղը լինեմ, ես էլ չեմ հասկանա»,-ասաց դասախոսը։ 

Նա նշեց, որ Արմեն Չարչյանը լուրջ առողջական խնդիր ունի, թթվածնային դիմակով է պառկած, ունի ճնշման տատանումները, շաքարի քանակը չի կարգավորվում, երիկամային խնդիր ունի, սրտի շրջանում կան սեղմոցներ։

«Նրա էլեկտրոսրտագրում փոփոխություններ կան, եթե չկանգնի այդ գործընթացը, ստենդավորումն չափազանց դժվարանալու է ուղեկցող հիվանդությունների հետ կապված, չանելն էլ ճիշտ չի լինելու»,- ասաց բժիշկը։

Նա ընդգծեց՝ իրենք քաղաքականության հետ որևէ գործ չունեն, խնդրում են՝  վիրահատական սեղանի մոտ վերադառնա այն պրոֆեսորը, ով երկար տարիներ բարդ վիրահատություններ է արել, ում ճանաչում են արտասահմանում։

Բժշկականի դասախոսի խոսքով, այնպես է արել, որ այսօր այստեղ մեծ բազմություն չհավաքվի, քանի որ մտավախություն ունի, որ կարող է շատ մարդ հավաքվի, իսկ իրենք պետք է այնպես անեն, որ այս ամենից մարդ չտուժի, իրենց սուրբ գործն է օգնել հիվանդին։

Նշենք, որ «Իզմիրլյան» բժշկական կենտրոնի ղեկավար պրոֆեսոր Արմեն Չարչյանին ազատ արձակելու պահանջով  «Իզմիրլյան» ԲԿ-ի անձնակազմը և մի շարք այլ բուժաշխատողներ հենց  բժշկական համազգեստով ՀՀ գխավոր դատախազության մոտ ակցիա են անում։ Նրանք նամակ են պատրաստել, որը ստորագրել է բժշկական հանրության 539  ներկայացուցիչ։ Նամակն ուղղված է ՀՀ քաղաքացուն, Փաշինյանին, նախագահ Արմեն Սարգսյանին, Գլխավոր դատախազ Արթուր Դավթյանին, վերաքննիչ դատարանին, արդարադատության և առողջապահության նախարարներին, Մարդու իարվունքների պաշտպան Արմեն Թաթոյանին։ Բժիշկները խնդրել, հորդորել պահանջել են վերացնել կալանքը։ Նամակը բժիշկները հանձնում են համապատասխան գերատեսչություններ։

Հիշեցնենք, որ հունիսի 23-ին Երևանի առաջին ատյանի ընդհանուր իրավասության դատարանի դատավոր Արմինե Մելիքսեթյանի որոշմամբ «Իզմիրլյան» բժշկական կենտրոնի ղեկավար Արմեն Չարչյանը մեկ ամսով կալանավորվել է։ Պաշտպանները հունիսի 24-ին ներկայացրել են  վերաքննիչ բողոք։

Պրոֆեսոր Չարչյանին մեղադրանք է առաջադրվել ՀՀ քրեական օրենսգրքի 154.2-րդ հոդվածի հատկանիշներով՝ ընտրողներին կաշառք տալը, ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը։