Ձեր վստահելի աղբյուրը

Կենտրոնական ընտրական հանձնաժողովի նախագահ Տիգրան Մուկուչյանը ԿԸՀ նիստում ներկայացրեց «Հայաստան» դաշինքի դիմումը, որտեղ թվարկված են մինչև քվեարկությունը և քվեարկության օրն արձանագրված խախտումները, պահանջվում է որոշում ընդունել ԱԺ ընտրություններն անվավեր ճանաչելու ու վերաքվեարկություն նշանակելու մասին։

«Հայաստան» դաշինքի կենտրոնական շտաբի պաշտոնական ներկայացուցիչ, փաստաբան Արամ Վարդևանյանն ասաց, որ իրենք փորձել են ներկայացնել հարցը ոչ թե բուն քվեարկության օրվա տրամաբանության մեջ, այլ ընտրական գործընթացի ողջ շղթայի մեջ։

«Քանի որ, կարծում ենք, որ հենց այս ընտրություններում ամբողջ շղթայի բացահայտումն է,  որ առանցքային նշանակություն ունի, թե ինչ տեսակ խնդիրներ, խախտումներ, այդ թվում համակարգված խախտումներ են տեղի ունեցել»,- նշեց Վարդևանյանը։

Նա տեղեկացրեց ԿԸՀ-ին, որ ընտրական գործընթացների ողջ շրջանում առաջին անգամ ՀՀ-ում որպես իրավական փաստ արձանագրվեց իշխող ուժի կողմից վարչական ռեսուրսի չարաշահման հանգամանքը վարչական դատարանի կողմից կայացված վճռով։

«Նշված հանգամանքը ևս առանացքային նշանակություն ունի, քանի որ այլևս փաստ է, որ այս գործընթացում նման տեսակ միջոց օգտագործվել է»,- ասաց Արամ Վարդևանյանը։ 

Նա նշեց, որ իրենց դիրքորոշումը հստակ է Սահմանադրական դատարանում հարցերը համակցության մեջ և առանձին-առանձին բարձրաձայնելու մասով, այս ընթացքում նաև բավականին բարդ աշխատանք է տարվում ընտրական ցուցակները ուսումնասիրելու մասով, և այդ հարցում արդեն որոշակի խնդիրներ արձանագրվել են, որոնք կամփոփվեն ու կներկայացվեն ՍԴ։

«Պատիվ ունեմ» դաշինքը և  «Զարթոնք» ազգային քրիստոնեական կուսակցությունը նույնպես դիմում-բողոքներ են ներկայացրել ԿԸՀ։

Լրագրողների հետ զրույցում Արամ Վարդևանյանն ասաց, որ ատելության խոսքը պարզապես բառեր չեն, եթե  դա հնչում է նաև իշխանական դիրքից հանդես եկող ուժի կողմից, որը շրջապատված է մշտապես բոլոր հավաքների ժամանակ երևի թե հազարավոր ոստիկաններով։

«Հիմա  պատկերացրեք, երբ նման խոսքեր են հնչում՝ «համայնքի ղեկավարների գլուխները ջարդվել են, փռելու են ասֆատին», «վենդետա անելու են»...

Այս արտահայտություններն ուղղակի ազդեցություն ունեցել են ընտրական գործընթացի վրա»,- ասաց «Հայաստան» դաշինքի կենտրոնական շտաբի պաշտոնական ներկայացուցիչը։

Ինչ վերաբերում է  վարչական ռեսուրսի օգտագործմանը, նա նշեց, որ երբ օգտագործվում է վարչական ռեսուրս, խաթարվում է ընտրական գործընթացի հավասարությունը, իսկ հավասարության  խաթարումը, բնական է, ազդեցություն է ունենում հենց քվեարկության վրա։

Նա նշեց, որ ավելի քան 109 հազար  անձի անձնագրերը չեն գործել, և հանձնաժողովի անդամները ստիպված են եղել համակարգչի միջոցով լրացնել տվյալները։

«Ես կարող եմ կասկածել, որ իրականում մասնագետի կողմից այդ պահին լրացվել է ոչ թե այն անձի տվյալները, որը ներկայացրել է անձնագիրը, այլ մեկ անձի տվյալ։ Կարող եմ կասկածել», - ասաց նա։

Անդրադառնալով զինվորների քվեարկությանը զինգրքույկներով,  Արամ Վարդևանյանը նշեց, որ զիվորական գրքույկի կեղծման  մեխամիզմերը կարող են շատ լինել, շատ չարաշահումներ լինեն։

«Եթե դիտարկում ենք անձնագրերի, զինվորների հետ կապված խնդիրները, շրջիկ մեխանիզմի հնարավորության խնդիրը, խոսքը գնում է 200 հազար ձայնից ավելի քվեների մասին։ Դա ընտրությունների  ելքն ամբողջությամբ փոխող թիվ է։ Այս հանգամանքներն ամբողջությամբ ներկայացվելու են Սահմանադրական դատարան»,- ասաց Արամ Վարդևանյանը՝ հավելելով, որ պատրաստում են ՍԴ իրենց դիմումը ներկայացնել հնարավորինս սեղմ ժամկետներում, օրենքի համաձայն՝ այսօրվա արդյունքների ամփոփումից հետո  հնգօրյա ժամկետում։

Նա ասաց, որ ՍԴ-ում վեճի լուծումից հետո  նոր կքննարկեն մանդատների հարցը։

Արամ Վարդևանյանի ներկայացմամբ,  ՍԴ-ն ունի երեք տեսակ որոշում, որ կարող է ընդունել՝ ընտրության արդյունքները ճանաչել անվավեր, ընտրության արդյունքներն անվավեր ճանաչել ու նշանակել երկրորդ փուլ, ընտրության արդյունքներն անվավեր ճանաչել և սահմանել մանդատների բաշխման նոր կարգ։

«Սահմանադրական դատարանում վարույթը, որն այս անգամ տեղի է ունենալու, նախկինում երբեք չի եղել։ Նախկինում իրավիճակը հետևյալն էր՝ դիմող կողմը պետք է ստանձներ քննիչի, դատախազի, ոստիկանի դերը, բերեր ապացույցներ, փաստաթղթեր և այլն։ Նոր ՍԴ մասին սահմանադրական օրենքի տրամաբանությունը հետևյալն է՝ դիմողի կողմից հայտնած տեղեկություններն հավաստի են մինչև հակառակը չի ապացուցվել։

Մենք կասկածն ենք բարձրաձայնում, այսինքն մենք բարձրաձայնում ենք 109 հազար մարդկանց մասով կասկած, ընտրական ցուցակների ուռճացման մասին կասկած,  որ կարող էին օգտագործել մարդկանց տվյալներ, որոնք ՀՀ-ում չեն ու չեն էլ եղել, կամ եղան հոսանքազրկումներ ձայների հաշվարկի ժամանակ, մատյանում գրանցված է լինում 1000 անձ, վերջին արձանագրությունում 1105, այսինքն 105-ը հայտնվել է»,- ասաց նա։

Արամ Վարդևանյան ընդգծեց՝ առավել քան լուրջ հիմնավորումներով, իրենց կողմից  բարձրաձայնվող հիմնավոր տեղեկություններով ու մտահոգություններով դիմելու են ՍԴ և առավել քան վճռական են լինելու։

«Սահմանադրական դատարանում ընտրությունների վեճը ոչ թե մաթեմատիակական վեճ է, ընտրությունների ամբողջ շղթայի գնահատումն է՝ սկսած այն հարցից, որ վարչապետի  պատոնակատարը փաստացի հրաժարական տալով պաշտոնից, մնացել է պաշտոնի, ատելության խոսքից մինչև վարչական ռեսուրսի չարաշահում, հունիսի 20-ին հատուկ թռուցիկներ բաժանելը «Հայաստան» դաշինքի վերաբերյալ և այլն»,- ասաց նա։

Արամ Վարդևայանը շեշտեց՝ սկսում են սահմանադրական արդարադատության փուլը։