Ձեր վստահելի աղբյուրը

ԱԺ արտահերթ նիստում քննարկվեց Կինեմատոգրաֆիայի մասին և կից ներկայացված օրենքների նախագծերի փաթեթն երկրորդ ընթերցմամբ և ամբողջությամբ ընդունելու մասին հարցը:

Հիմնական զեկուցող ԱԺ «Լուսավոր Հայաստան» խմբակցության անդամ Աննա Կոստանյանն ասաց, որ Կինեմատոգրաֆիայի մասին օրենքի նախագիծը շատ երկար ճանապարհ է անցել:

Նա նշեց, որ այս օրենքի գերնպատակն արտադրողի համար ՀՀ-ում, նաև միջազգային համատեղ արտադրության համար բարենպաստ պայմաններ ստեղծելն է, որպեսզի ի վերջո հայ արտադրողը կարողանա իր ֆիլմերի և իր զարգացման հետևանքով երկու հիմնական խնդիր լուծել պետության համար՝ ձեռք բերել միջազգային մշակութային հեղինակություն և խթանել երկրի տնտեսական աճը: Վերջինս, ըստ պատգամավորի,  հնարավոր կարող է դառնալ ներգրավելով ֆիլմարտադրության համար միջազգային ներդրումներ:

«Այս օրենքով լուծում ենք երեք խնդիր՝ տեղի կինոարտադրողի զարգացում, համատեղ արտադրության զարգացում և օտարերկրա ներդրումների  ներգրավում»,- ասաց Աննա Կոստանյանը:

Նախագծում հատուկ կետ կա կինեմատոգրաֆիայի ոլորտի պետական աջակցության, պետական բյուջեի միջոցների հաշվին ֆինանսավորման, դրամագլխի միջոցների հաշվին ֆինանսավորման և մրցույթ անցկացնելու կարգի ու պայմանների մասին:

Դրամագլխի գումարները պահվում են կենտրոնական գանձապետարանում ազգային մարմնի անվամբ բացված հաշվում եւ բացառապես օգտագործվում են ազգային ֆիլմերի ստեղծման, տարածման, առաջխաղացման և մրցունակության բարձրացման նպատակով: Ազգային մարմինը վարում է առանձնացված հաշվառում դրամագլխին հատկացումների եւ դրամագլխի օգտագործման մասով՝ դրանց վերաբերյալ տեղեկություններն արտացոլելով խորհրդին ներկայացվող հաշվետվություններում:

Հիմնական զեկուցողն ասաց, որ այս օրենքի ընդունմամբ հնարավոր կլինի ապագայում կառավարության որոշման հիման վրա Հայաստանում ներդնել աշխարհում մեծ տարածում ունեցող ֆիլմ հանձնակատարի ինստիտուտը, արդյունքում հնարավոր կլինի ֆիլմ հանձնակատարի միջոցով ապահովելու ՀՀ՝ որպես ֆիլմարտադրության գրավիչ երկիր առաջխաղացումը:

ԿԳՄՍ նախարարի տեղակալ Արա Խզմալյանի խոսքով, օրենքում բովանդակային, մշակութային առումով խնդրահարույց կետեր չկան, կարծում է՝ այն ընդունելու դեպքում օրենքի կենսունակությունը և կիրառելիությունը կդառնա ակնհայտ: Նա նշեց, որ օրենքն ընդունվելու դեպքում ուժի մեջ կմտի մեկ տարի անց, իսկ մինչ այդ կգործեն նախորդ բոլոր իրավական կարգավորումները: