Ձեր վստահելի աղբյուրը

«Այո, վստահաբար ես ասում եմ՝ Արցախի իշխանությունը, Արցախի ժողովուրդը չի ընդունելու, որ որևէ ձևով Արցախը մտնի Ադրբեջանի կազմի մեջ»,-այսօր առցանց ասուլիսի ժամանակ հայտարարեց Արցախի պետական նախարար Արտակ Բեգլարյանը։

Նա նշեց, իհարկե Արցախում այս պահին դժվար պայմաններ են, բայց դա չի նշանակում, որ հնարավորություն չունեն պայքարելու։

«Ճանապարհն ավելի երկար է հիմա, բայց մյուս կողմից մենք ունենք լրացուցիչ, այդ թվում արտաքին քաղաքական հնարավորություններ մեր ինքորոշման իրավունքի պաշտպանությունը շատ ավելի ընդգծված կերպով կազմակերպելու համար։ Գոնե փաստարկների առումով սա ընկալելի է միջազգային հանրության համար, քանի որ հակամարտության կարգավորման երեք սկզբունքներից երկուսն արդեն ժամանակավրեպ են։ Տարածքային ամբողջականության, ինչպես նաև ուժի, ուժի սպառնալիքի չկիրառման սկզբունքները ժամանակավրեպ են պատերազմի հետևանքով»,-ասաց Բեգլարյանը։

Նա շեշտեց, որ այս պահին մնացել է ազգերի ինքորոշման իրավունքը, որը շատ լավ գիտակցում են Մինսկի խումբն ու միջազգային հանրությունը։

«Այս ուղղությամբ մենք մեր պայքրաը շարունակելու ենք։ Իհարկե, Հայաստանի Հանրապետությունն էլ պետք է գործուն ջանքեր գործադրի։ Հույս ունենք, որ առաջիկայում որոշակի դրական առաջընթաց լինելու է այս մասով»,-նշեց նա։

Արցախի մեկ այլ բնակիչ հետաքրքրվել էր, թե ի՞նչ է արվում Արցախից արտագաղթը կանխելու համար։ Բեգլարյան ասաց, այդ առումով երկու խնդիր կա լուծելու՝ անվտանգության ու բնակարանային։

«Բարեբախտաբար, հետպատերազմյան նոյեմբեր, դեկտեմբեր, նույնսիկ հունվար ամիսների համեմատ, մեզ համար ակնհայտ է, որ անվտանգության պայմաններն ավելի արդյունվետ են, քան շատերը սպասում էին։ Այսինքն, մեր ակնկալիքները վատն էին, քան իրականությունը եղավ։ Սա արդեն դրական հույս է տալիս մեր հասարակությանը, որ կարող են այստեղ երկարաժամկետ կյանք պլանավորել»,-ասաց նա։

Անդրադառնալով հարցին, թե ինչ է լինելու, երբ ռուս խաղաղապահների առաքելության ժամկետն ավարտվի, պետնախարարը կարծիք հայտնեց, որ այդ առաքելությունը հինգ տարով չի սահմանափակվի։

«Թե լուծումները ինչպիսին կլինեն,  ցույց կտան ժամանակն ու գերտերություններն իրենց գործողություններով։ Ես համոզված եմ, որ մենք երկար ժամանակ ունենալու ենք այստեղ ռուս խաղաղապահներ, որոնք կերաշխավորեն անվտանգությունը։ Իհարկե, մեր պաշտպանության բանակն ու զինված ուժերն էլ իրենց մասով են երաշխավորու, կարծում եմ, ապագայում էլ ավելի արդյունավետ են երաշխավորելու»,-ասաց Արցախի գործադիր մարմնի ներկայացուցիչը։