Ձեր վստահելի աղբյուրը

«Հատկապես հիմա, առավել քան երբևէ, Հայաստանը կարիք ունի կրթված գաղափարական արժեքներով առաջ շարժվող երիտասարդության, որովհետև միայն այդպես մենք կարող ենք տարածաշրջանում դառնալ հզոր պետություն և հաղթահարել մեր երկրի առաջ ծառացած անհաղթահարելի թվացող մարտահրավերները»,- «ԵԱՏՄ ազատ առևտրի համաձայնագրերը և ներքին շուկայի պաշտպանությունը» թեմայով քննարկման ժամանակ հայտնեց նախաձեռնող, «Հրայր Մարուխյան» հիմնադրամի տնօրեն Շաղեր Մարուխյանը:

Նա ասաց, որ ուսումնասիրությունը պատրաստ է եղել դեռ 2020 թվականին, սակայն կորոնավիրուսի համավարակը, պատերազմը և քաղաքական անիրական զարգացումները շնորհանդեսի ուշացման պատճառ են դարձել:

Շաղեր Մարուխյանը հայտնեց, որ հիմնադրամի հիմնական առաքելությունն ազգային, տարածաշրջանային երկխոսության խթանումն է և ՀՀ քաղաքացիներին՝ քաղաքական կյանքի փոփոխություններին համապատասխան դիրքորոշումներ ձևավորելուն աջակցելը՝ հիմնվելով հավասարության, սոցիալական արդարության և արժանապատվության արժեհամակարգի վրա:

«Ֆրդրիխ էբերտ» հիմնադրամի Հայաստանի գրասենյակի տնօրեն Նաիրա Գևորգյանն էլ տեղեկացրեց, որ 1995 թվականից հիմնադրամն աջակցում է Հայաստանում ժողովրդավարության զարգացմանը, կայուն հասարակության կայացմանը և ուրախությամբ աջակցել է ուսումնասիրության իրականացմանը:

ՀՅԴ Բյուրոյի տնտեսական հետազոտությունների գրասենյակի պատասխանատու, ուսումնասիրության համահեղինակ Սուրեն Պարսյանը հայտնեց, որ վերլուծությունը նպատակ ունի աջակցելու, որպեսզի Հայաստանի գործունությունը ԵԱՏՄ-ի շրջանակներում ավելի արդյունավետ լինի և կարևորեց մասնագիտական և քաղաքական քննարկումները:

«Մենք 5 տարի է անդամակցում ենք ԵԱՏՄ-ին, բայց նրա հնարավորությունների շատ չնչին մասն ենք օգտագործել և մեր հանրությունն ու բիզնեսը խիստ զգում է այս քննարկման կարիքը»,- հայտնեց Պարսյանը:

Նա նկատեց, որ ժամանակակից տնտեսակարգում երկրներն իրենց չեն պատկերացնում առանց այլ երկրների հետ ինտեգրացիայի, բայց այն կարող է ազդել տվյալ երկրի վրա, ինչպես օրինակ՝ գործընկեր պետության վրա տնտեսական սանկցիաներ կիրառելը։

Տնտեսագետի խոսքով՝ ԵԱՏՄ-ի նպատակն անդամ երկրների ապրանքների, աշխատուժի ազատ տեղաշարժն է։

Սուրեն Պարսյանը նկատեց, որ ԵԱՏՄ-ն Հայստանին հնարավորություն է տալիս դառնալ 180 միլիոնանոց շուկայի մաս՝ առավել ևս, որ Հայաստանը ԵԱՏՄ երկրների մեջ միակն է, որը միացել է GSP և GSP+ համաձայնագրերին:

Նա հայտնեց՝ ԵԱՏՄ մաքսային կարգավորումները միտված են նրան, որ երրորդ երկրներից ներմուծվող ապրանքների մաքսային տուրքերը բարձրանան՝ դրանով խթանվի անդամ պետությունների ներքին արտադրությունը:

Սուրեն Պարսյանը փաստեց, որ մինչ այդ Առևտրի համաշխարհային կոմիտեի մաքսատուրքերի իջեցման քաղաքականությունը հանգեցրել էր նրան, որ Հայաստանն ավելի շատ ներմուծել է, քան արտահանել: