Ձեր վստահելի աղբյուրը

Բժշկական հանրության հարյուրավոր ներկայացուցիչներ օրեր առաջ նամակներ էին հասցեագրել պատկան մարմիններին պրոֆեսոր Արմեն Չարչյանի գործով: ԵՊԲՀ դասախոս Սամվել Սահակյանը, ով անձամբ էր հանձնել նամակները, լրագրողների հետ զրույցում ասաց, որ արձագանքներ ստացել են:

Նա հայտնեց, որ իրեն զանգահարել է ՀՀ նախագահի օգնականն ու առաջարկել հաջորդ շաբաթ, եթե ցանկություն կա իր կողմից, հանդիպել նախագահին:  

«Մենք երախտապարտ կլինենք, որ մտավորականների այսպիսի մեծ խմբին չարհամարհեն։ Մեզ համար դժվար կլինի մեր հետագա աշխատանքը, եթե արհամարհված լինենք։ Իմ հույսն է, որ մեզ կլսեն»,- ասաց ԵՊԲՀ դասախոսը:

Նա նշեց, որ Արմեն Չարչյանի ընկերն է, ուզում է հաղթի արդարադատությունը։

«Ես ճանաչում եմ նրան և գիտեմ, որ օրենքից դուրս բան չի կատարի։ Արձակուրդի մեջ գտնվող մարդը հավաքել է իր աշխատակիցներին, որոնք այդ պահին իր աշխատակիցները չեն, իր սրտի խոսքն է ասել։ Նրա վերջին բառերն ամեն ինչ տեղն է գցում։ Եթե ամեն ինչ ճիշտ է, արդարացի է, ազնիվ, չկա այլ միտում, համոզված եմ…

Կարծում եմ, որ այսօր այս դատական նիստի ավարտին շնորհակալություն կհայտնեմ և՛ դատարանին, և՛ ՀՔԾ-ին, և՛ դատախազությանը: Ճշմարտությունը չի կարելի պահել»,- ասաց դասախոսը: 

Հարցին՝ ի՞նչ տրամադրություն է հիվանդանոցում, հիվանդներն ինչպե՞ս են արձագանքում, Սամվել Սահակյանն ասաց, որ մարդիկ սպասում են Արմեն Չարչյանին, որ վերջինս խորհրդատվություն տա, օր նշանակի նրանց համար։

««Իզմիրլյան» բժշկական կենտրոնի բժիշկներն աշխատում են ամբողջ ծավալով։ Ոչ մի հիվանդ չի մնում առանց բուժման։ Նույնիսկ պլանային վիրահատություններն են ժամանակին, պատշաճ իրականացվում։ Մթնոլորտը լավը չի, բայց դրանից ոչ մի հիվանդ չի տուժում»,- նշեց Սամվել Սահակյանը։