Ձեր վստահելի աղբյուրը

«Շատ արդյունավետ քննարկում տեղի ունեցավ՝ մեր առաջարկած ձևաչափով»,- այս մասին լրագրողների հետ զրույցում հայտարարեց Արմեն Չարչյանի պաշտպան Էրիկ Ալեքսանյանը։

Նրա խոսքով՝ Վերաքննիչ դատարանում քննվող բողոքն ընթացել է հարց ու պատասխանի ձևաչափով, ինչն արդյունավետ էր։

Էրիկ Ալեքսանյանը նշեց, որ փաստարկները ներկայացրել են ամբողջ ծավալով։

«Վերահաստատեցինք մեր դիրքորոշումը՝ հիմնավոր չէ կասկածն առ այն, որ Արմեն Չարչյանն առնչություն չունի իրեն վերագրվող հանցավոր արարքի կատարման հետ։ Դրա հիմքում պաշտպանության կողմը դրել է այն փաստարկը, որ չպետք է  դատարանը քննարկման առարկա դարձներ և հիմք ընդուներ քննիչի կողմից ներկայացված մոնտաժված ձայնագրությունը։  

Վերաքննիչ դատարանում հենց այդ հարցը բարձրացրեցինք»,- ասաց փաստաբանը։

Նրա խոսքով՝  հիմնավոր կասկածն այնքանով պատշաճ չի գնահատվել դատավորի կողմից, որ առհասարակ գնահատման չի արժանացել նրանց կողմից տրամադրված տեսաձայնագրությունը, որը առհասարակ հիմնավոր կասկածը հերքող է։

«Գործի մեջ ունենք ձայնագրություն և տեսաձայնագրություն, որտեղ պարոն Չարչյանի կողմից արտահայտած բոլոր բառերը, խոսակցության ողջ բովանդակությունն արտացոլված է։ Հետևաբար, նման օբյեկտիվ ապացույցի փաստական տվյալի պայմաններում, որևէ մեկի վրա ազդեցություն գործադրելու նպատակ չի կարող լինել»,- նշեց Ալեքսյանյանը։

Մինչդեռ փաստաբանի խոսքով ՝դատախազությունը ներկայացրել է անհիմն փաստարկներ։

«Այնպիսի տպավորություն էր, որ դատախազը ցայտնոտի մեջ է գտնվում, շատ լարված էր խոսում և անհասկանալի էր նրա վարքագիծը»,- տեղեկացրեց Ալեքսանյանը։

Նա նաև նշեց. 

«Պայմանավորվածություն ձեռք բերվեց, որ ժամը վեցից հետո կարող ենք շարունակել մեր աշխատանքը և դատարանը կարող է լսել բոլոր կողմերին և ավարտել քննությունը։ Դատախազը չառարկեց, այսինք՝ շարունակեցինք վեցից հետո աշխատել։ Սակայն մի պահ դատախազը հայտարարեց, որ չի ցանկանում գործի քննությանը մասնակցել, աշխատանքային ժամն ավարտվել է և նա ցանկանում է իր դիրքորոշումը հաջորդ դատական նիստին ներկայացնել։ Դատախազի կողմից ցուցաբերվող նման վարքագիծը միանշանակ պատժիչ բնույթ է կրում»։

Փաստաբանների համար դատախազի վարքագիծն անհասկանալի է եղել, քանի որ անազատության մեջ գտնվող մարդն՝ Արմեն Չարչյանն ունի առողջական խնդիրներ։

«Ազատության իրավունքը դա սպիտակ թերթի վրա սև տառերով տպագրված երևույթ չէ, միանշանակ վստահ եմ, որ դատախազի համար այդ  բարձր արժեք ունեցող իրավունքը երևույթ է, այդ իսկ պատճառով նա նման վարքագիծ դրսևորեց։ Չէ որ անձը գտնվում է անազատության մեջ։ Անձն ունի  առողջական խնդիրներ և այս ամենով հանդերձ դատախազն ասում է, որ աշխատանքային ժամն ավարտվել է և չի ցանկանում բողոքի քննությունը շարունակել»,- ասաց Ալեքսյանյանը։

Փաստաբան Արամ Վարդևանյանն էլ դատախազի նման վարքագիծն անպատասխանատու քայլ որակեց։

«Ո՞նց կարող է մարդն էդքան անպատասխանատու վերաբերվել մարդու ճակատագրին ու առողջությանը։ Այն, որ մեր դատախազությունը 2018-ից ապօրինության և մարդու իրավունքների նկատմամբ անհարգալից վերաբերմունքի անգերազանցելի բարձրունքներ է սահմանում, փաստ է, բայց այս մակարդակի՞, զարմացած եմ»,- ընդգծեց նա։
 
Նշենք, որ փաստաբանները տեղեկացրեցին՝ Վերաքննիչ դատարանում գործի քննությունը  կշարունակվի հաջորդ աշխատանքային օրը՝ երեքշաբթի, ժամը՝ 14․00-ին։