Ձեր վստահելի աղբյուրը

Վերաքննիչ դատարանում տեղի է ունենում Արմեն Չարչյանի գործով պաշտպանական կողմի ներկայացված վերաքննիչ բողոքի քննությունը: Արմեն Չարչյանին կալանավորելու որոշման դեմ վերաքննիչ բողոքը մակագրվել է դատավոր Լուսինե Աբգարյանին։

Նախքան դատական նիստը, ինչպես լրագրողների հետ զրույցում ասաց Արմեն Չարչյանի պաշտպաններից Արամ Վարդևանյանը, դատավոր Արմինե Մելիքսեթյանը, երբ մասնակի բավարարել էր կալանավորման միջնորդությունը՝ երկու ամսվա փոխարեն մեկ ամսով, երկու հիմք էր նշել՝ Արմեն Չարչյանը «Իզմիրլյան» բժշկական կենտրոնի տնօրեն է, կան մարդիկ, որոնք պետք է հարցաքննվեն, որոնք ԲԿ-ի աշխատակցիներ են:

«Այսօրվա դրությամբ էլ չկա մարդ, ում պետք է հարցաքննեն, քանի որ նախաքննության ավարտը դա է նշանակում, նաև դատավորին, դատախազին, քննիչին փոխանցել էի այն տվյալը, ռեգիստրից քաղվածքը, որ հունիսի 30-ի դրությամբ  պարոն Չարչյանը չի հանդիսանում ԲԿ-ի տնօրեն, մեկ այլ անձ է  նշանակվել տնօրեն:

Այսինքն, երկու հիմքն էլ այևս գոյություն չունեն և դրա հետ հաշվի չնստել՝ ուղղակի իրավաբանություն չէ, այլ բան է: Ամեն դեպքում մենք եկել ենք դատարան, որտեղ կա Հայաստանի զինանշանը, դրոշը, հույս ունենք, որ կունենանք հանուն օրենքից, իրավունքից բխող  դատական ակտ: Այս դեպքում կալանքից ազատելու այլընտրանքն ուղղակի չկա»,- ասաց Արամ Վարդևանյանը: 

Հարցին՝ արձագանք ստացե՞լ են դատախազությունից Արմեն Չարչյանի խափանման միջոցը փոխելու վերաբերյալ 7 պատգամավորի և 3 բժիշկի կողմից ներկայացված անձնական երաշխավորության միջնորդությունից, պաշտպանն ասաց.

«Երկու օր առաջ է ստացել, ինչն էլի շատ անհանգստացող է: Երկու օր առաջ տեղեկացրեցին, որ երաշխավորության միջնորդությունը մերժել են, քանի որ դեռ գործ ունեն անելու վկաների հետ: Մեղմ ասած, անկեղծ չէին դատախազության ներկայացուցիչները,  որովհետև եթե այսօր նախաքննության ավարտ է հայտարարվում, երկու օր առաջ արդեն դրան նախապատրաստվել էին, այսինքն, այդ տվյալն իրենք ունեին, պարզապես կամայական մերժել են:

Առնվազն երկու օր առաջ իրենք արդեն գիտեին, որ հասել են գործի քննության այնպիսի փուլի, որ նախաքննության ավարտին են մոտենում»:

Արամ Վարդևանյանը գտնում է, որ սա սխալ է անվանել աշխատանքներում թերացում, քանի որ գործ ունեն պրոֆեսիոնալ իրավաբանների հետ, հետևաբար, պարզապես սա այն է, ինչն ի սկզբանե ասում էին՝ այստեղ կա քաղաքական բաղադրիչը, և դրանից ելնելով ունեն այն պատկերը, որ ունեն:

«Այսինքն, հեղինակություն վայելող 10 հոգի ասում են՝ պրոֆեսոր Չարչյանը չի խոչընդոտի գործի քննությանը: Ավելի ի՞նչ էր պետք: Ի դեպ, մենք պատրաստ էինք, որ տասը լինեին երաշխավոր, իրենցից յուրաքանչյուրը նաև 500 հազար դրամ գումար վճարելու պատրաստակամություն ուներ, բայց դա բավարար չէր: Դա նշանակում է՝ ուղղակի պետք է, որ պրոֆեսոր Չարչյանը կալանավորված լինի: Իսկ դա իրավաբանություն չէ»,- ասաց Վարդևանյանը:

Նա հայտնեց, որ Արմեն Չարչյանը դեռ գտնվում է հիվանդանոցում:

«Եթե դատարանը նույնիսկ վերացնի կալանավորումը, պրոֆեսոր Չարչյանը չի կարող այս պահին դուրս գրվել հիվանդանոցից»,- ասաց պաշտպանը: 

Հիշեցնենք, որ հունիսի 23-ին Երևանի առաջին ատյանի ընդհանուր իրավասության դատարանի դատավոր Արմինե Մելիքսեթյանի որոշմամբ «Իզմիրլյան» բժշկական կենտրոնի ղեկավար Արմեն Չարչյանը մեկ ամսով կալանավորվել է։ Պաշտպանները հունիսի 24-ին ներկայացրել են  վերաքննիչ բողոք։

Պրոֆեսոր Չարչյանին մեղադրանք է առաջադրվել ՀՀ քրեական օրենսգրքի 154.2-րդ հոդվածի հատկանիշներով՝ ընտրողներին կաշառք տալը, ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը։