Ձեր վստահելի աղբյուրը

«Ակնկալիքները շատ են, որ այսօր դատարանի որոշմամբ Արմեն Չարչյանի նկատմամբ առնվազն խափանման միջոցը կփոխվի, հետո արդեն մեղադրանքը կփոխվի»,- այս մասին Վերաքննիչ դատարանի բակում լրագրողների հետ զրույցում ասաց ՀՅԴ անդամ Գեղամ Մանուկյանը։

Նա նշեց, որ վերաքննիչ դատարանի դեպքում բազմաթիվ են օրինակները, երբ ուղղակի հլու-հնազանդ կամարտահայտողներ չեն, այլ շարժվում են ՀՀ օրենքներով, Սահմանադրությամբ։

«Կա մի յուրահատկություն՝ մեղադրանքն այնքան շինծու է, ստորաբար կառուցված, որ նույնիսկ իրավապահները խճճվել են: Դրա համար ՀՔԾ, դատախազությունը տարբեր պատճառաբանություններ են բերում, ինչն էլ հստակ ցույց է տալիս, որ պրոֆեսոր Չարչյանին առաջադրված մեղադրանքը շինծու է, մեղադրանքն ունի ամբողջությամբ քաղաքական  նպատակներ»,- ասաց Գ. Մանուկյանը:

Հիշեցնենք, որ Վերաքննիչ դատարանում տեղի է ունենում Արմեն Չարչյանի գործով պաշտպանական կողմի ներկայացված վերաքննիչ բողոքի քննությունը:

ՀՅԴ-ական Արծվիկ Մինասյանի խոսքով, գործ ունեն իշխանության հետ, որը ոչ միայն մանիպուլյացիներով, կեղծիքներով զավթել է իշխանությունը, այլև շարունակում է հասարակությանը պահել ահաբեկման մթնոլորտում:

«Ուշադիր հետևեք սրանց արտահայտություններին, այլևս անթաքույց չեն էլ հասկանում ինչ բան է իրավունքը, օրենքը, ամեն օր մասսայաբար խախտում են մարդկանց հիմնարար իրավունքները, օրենքները, Սահմանադրությունը, չպետք է զարմանալ, որ նաև բժշկական հանրույթի նկատմամբ էլ ավելի են ուժեղացնելու իրենց գործողությունները: Ինչո՞ւ, որովհետև արժանապատվությունն այս մարդկանց համար խորթ է»,- ասաց նա: 

Ա.Մինասյանը նշեց, որ եթե իշխանությունը հետ չկանգնի իր շարունակաբար արատավոր վարքագծից, դա տանելու է վերջնականապես ատելության ու թշնամանքի խորացմանը հասարակությունում, եղած պետականության կորստին:

Մեդիափորձագետ Տիգրան Քոչարյանն ասաց, որ բացի սադիստությունից որևէ հիմք չկա Արմեն Չարչյանին կալանքի տակ պահելու համար:

«Այն, ինչ անում է իշխանությունը, ուղղակի սադիստություն է. մարդն ունի առողջական խնդիրներ, գտնվում է հիվանդանոցում, գիտեն, որ այդ վիճակը նեղում է այդ մարդուն, նա կարող է ավելի վատ զգալ իրեն: Այս իշխանության ձեռագիրն է:

Պարոն Չարչյանն ու այս իշխանությունը երկու տրամաբանական տարբեր բևեռների վրա են գտնվում, որովհետև պարոն Չարչյանը կյանքեր է փրկում, իսկ այս իշխանությունը բացի մարդկանց սպանելուց՝ քովիդով կամ պատերազմի միջոցով,  այլ բանի ունակ չէ: Դրա համար կարելի է նույնիսկ եզրակացնել, որ պարոն Չարչյանի նման մարդիկ այս իշխանությունների համար դասակարգային թշնամի են, որովհետև այն, ինչ անում է Չարչյանը, լրիվ հակառան անում է իշխանությունը»,- ասաց Տ. Քոչարյանը:

Նա նշեց, որ վերջին անգամ բժիշկների դեմ որս է սկսվել 1950-ականերին Ստալինի կողմից:

«Կարծում եմ, մյուս բժիշկներն էլ պետք է մտածեն, քանի որ բժիշկների շերտն ատելություն է գեներացնում Փաշինյանի մոտ, վաղը, մյուս օրը այլ բժիշկներ, ովքեր իրենց փորձը, անունը, բժշկական ունակությունները պատրաստ չեն զոհել Փաշինյանին դուր գալու համար, այդ բոլոր մարդիկ կունենան պրոբլեմներ:

Դրա համար մնացած բժշկները, որոնք պասիվ են, մտածում են իրենց կողքով կանցնի, չէ, ձեր կողքով չի անցի, քանի որ դուք որպես դաս ատելի եք»,- ասաց մեդիափորձագետը: