Լուկաշենկո. Փորձել են պայթեցնել Մինսկի մարզում գտնվող Ռուսաստանի ռազմածովային ուժերի հաղորդակցման կենտրոնը

Քաղաքական 11:48 03/07/2021 Աշխարհում

Լուկաշենկո. Փորձել են պայթեցնել Մինսկի մարզում գտնվող Ռուսաստանի ռազմածովային ուժերի հաղորդակցման կենտրոնը

Բելառուսի նախագահ Ալեքսանդր Լուկաշենկոն ասել է, որ քնած ահաբեկչական բջիջները՝ «ինքնապաշտպանական ջոկատները», որոնք բացահայտվել են հանրապետությունում, պատրաստվում էին պայթեցնել Վիլեյկա քաղաքում (Մինսկի մարզ) Ռուսաստանի ռազմածովային ուժերի հաղորդակցման կենտրոնը: Այդ մասին հայտնում է ՏԱՍՍ-ը:

Ըստ ԲելՏԱ հեռուստաալիքի, ուրբաթ օրը ելույթ ունենալով Անկախության օրվա առթիվ կայացած հանդիսավոր հանդիպմանը նախագահը նշել է, որ Ուկրաինայից բերվել են սարքեր (ջերմային սենսորներ և այլն), որոնք պահվել են թաքստոցում, և դրանք նախատեսված են եղել օգտագործել Վիլեյկան պայթեցնելու համար: Այն Ռուսաստանի Դաշնության կայանն է, որը կապ է հաստատում Ատլանտիկայի նավատորմի հետ:

Լուկաշենկոն նշել է, որ վերջին հեռախոսազրույցի ընթացքում միջադեպը քննարկել է իր ռուս գործընկեր Վլադիմիր Պուտինի հետ: «Այս խնդիրը մենք լրջորեն քննարկեցինք: Դուք հասկանում եք այդ քննարկման արդյունքը»,- ավելացրել է Բելառուսի ղեկավարը:

Ըստ Լուկաշենկոյի, բոլոր մասնակիցները, ներառյալ կազմակերպիչները, հայտնաբերվել և ձերբակալվել են երկու օրվա ընթացքում:

Վիլեյկայում Ռուսաստանի ռազմածովային ուժերի 43-րդ հաղորդակցման կենտրոնը («Անտեյ» ռադիոկայանը) գործում է Մինսկի մարզում դեռ 1964 թվականից և գերարագ ալիքներով կապ է ապահովում Ռուսաստանի ռազմածովային ուժերի գլխավոր շտաբի և միջուկային սուզանավերի միջև, որոնք մարտական հերթապահություն են իրականացնում Ատլանտյան, Հնդկական և Խաղաղ օվկիանոսներում: Կայանը նաև իրականացնում է էլեկտրոնային հետախուզություն և ռադիոտեխնիկական պատերազմ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: