Ձեր վստահելի աղբյուրը

«Եվրոպան, Արևմուտքը ողջունում է գերիների վաճառքը: Այդ գործարքն այլ անուն չունի: Բայց առաջին քայլը եղել է հողերի հետ միասին հանձնել հայերին Ադրբեջանին»,- ասուլիսում ասաց իրավապաշտպան Լարիսա Ալավերդյանը:

Նրա խոսքով, գերիներին դարձրել են առևտրի առարկա, բայց ամենակարևորն այն է, թե ի՞նչ իրավունքով է Փաշինյանը հանձնում այն տարածքների քարտեզները, որոնք Հայաստանի վերահսկողության ներքո չեն:

«Ես չգիտեմ՝ ինքն ում հետ է համագործակցում, ըստ երևույթին Արայիկ Հարությունյանի, իրեն չպատկանող գաղտնիքների, նյութերի, իր լիազորության ներքո չգտնվող այդ տարածքների շուրջ նա առևտուր է անում: Նույնը վերաբերում է նոյեմբերի 9-ին:

Ի՞նչ իրավունքով է այդ անձը ստորագրել ինչ որ կետեր, որոնք վերաբերում են ոչ Հայաստանի տարածքներին: Արդյո՞ք դա տեղի է ունեցել հանցավոր համաձայնությամբ Արայիկ Հարությունյանի հետ:

Ովքեր են այդ երկու անձը, արդյո՞ք նրանք լեգիտիմ են, ինչպես իրենք պնդում են: Ոչ, որովհետև լեգիտիմությունն ընտրվելուց հետո էլ, առաջ էլ մի մեծ հիմք ունի՝ իրականացնել ու պահպանել օրենքը և Սահմանադրությունը, անել այն ամենը, ինչ օգուտ է Հայաստանին և Արցախին, այսինքն՝ ոչ միայն տարածքային ամբողջականություն, այլ այն դեպքերում, երբ  տարածքային ամբողջականությունն ակնհայտորեն  խախտվում է, ձեռնարկել անհրաժեշտ քայլեր»,- նշեց իրավապաշտպանը:

Լարիսա Ալավերդյանի խոսքով, երբ ողջունում են գերիների վերադարձը, եվրոպացի բարձրաստիճան պաշտոնյաները նպաստում են մարդկանց անել, ինչ ուզում են, անօրինական վերցնել, գերության մեջ պահել:

Իր խոսքն ուղղեց նաև Ռուսաստանի ջատագովներին. «Կարելի՞ է չէ դիմել Ռուսաստանին ու ասել, որ դա հարիր չէ խոշոր պետությանը, որը ձգտում է լինել սուպեր պետություններից մեկը, ստորագրություն դնել մի փաստաթղթի վրա, որից մեկի ստորագրությունը լեգիտիմ չէ մի քանի առումով, առաջին՝ չի անցել մեր ազգային Ժողովով, Սահմանադրական դատարանով, խոսքը գնում է  տարածքների մասին, որոնք չեն գտնվում Հայաստանի վերահսկողության ներքո»:

Լ. Ալավերդյանի խոսքով, չի կարելլի հունիսի 20-ին կայացած ընտրությունները համարել բախտորոշ մեր երկրի ու ժողովրդի համար: Ըստ նրա, չի ավարտվել արտահերթ ընտրությունների շարքը:

«Մինչ այդ արտահերթ ընտրությունները, անհրաժեշտ է  բոլոր նրանք, ովքեր կուսակցություններ են ստեղծում ընտրություններից առաջ, հասկանան, որ խնդիր կա. մենք վտանգված պետությունների ցուցակում ենք հայտնվել, անդունդի ամենացածր մակարդակի վրա ենք, ու իրենք պետք է աշխատեն ժողովրդի հետ: Ժողովուրդը մի դրական բան չի ստացել այս իշխանություններից: Այն, ինչ տեղի է ունենում, մանիպուլյատիվ և ամենագռեհիկ ստերի վրա է կառուցված»,- ասաց իրավապաշտպանը:

Նա ընդգծեց՝ Հայաստանը կանգնած է նոր մարտահրավերի առաջ:

«Փաշինյանը ոչ թե նոր հողեր է հանձնում, նա իրենց մտածելակերպով այդպես փրկում է՝ հանձնվելով ամբողջովին Թուրքիային՝ թուրքահպատակ դառնալու համար:

Բոլոր նրանք, ովքեր ունեն հայեցակարգ, որն ամբողջովին հայեցի է, Փաշինյանի համար բոլորը թշնամիներ են»,- ասաց Լարիսա Ալավերդյանը: