Ձեր վստահելի աղբյուրը

«Ադրբեջանը շարունակում է ոչ միայն կոպտորեն ոտնահարել միջազգային մարդասիրական իրավունքի նորմերը, նաև հակադրվում է»,- ասոլիսում ասաց իրավապաշտպան Լարիսա Ալավերդյանը:

Նրա գնահատմամբ, հատկանշական է, որ այդ դեպքում միջազգային հանրությունը մինչև անգամ ողջունում է այդ քաղաքականությունը:

«Այսինքն, այստեղ կա այնպիսի կծիկ՝ աշխարհաքաղաքական և այլ պայմանավորվածությունների ու շահերի, որը Նիկոլ Փաշինյանի թիմը դարձնում է երանելի թիմ և Ալիևի, և Եվրոպայի համար»,- նշեց Լ.Ալավերդյանը:

Իրավապաշտպանի խոսքով, երանելի է նաև Փաշինյանի թիմը Հայաստանում այն խավի համար, որն  ընդգծված պրոթուրքական կողմնորոշում ունի:

Լ. Ալավերդյանը համարում է՝ ճիշտ ժամանակն է, որ հայ հասարակագետներն ուսումնասիրություն անցկացնեն՝ հասկանալու, թե հասարակությունն ինչքանով է փոխվել 1988 թվականից հետո:

Նա նշեց, որ հայ ժողովուրդն արցախյան պատերազմում հաղթել է՝ ազատագրելով Ադրբեջանին իրավական առումով չպատկանող այն բոլոր տարածքները, որոնք կոչվում են 7 շրջան:

«Եթե ինչ որ մեկն ինձ չի հավատում, թող ցույց տա մի միջազգային փաստաթուղթ, որտեղ գրված է, որ բոլորս պարտավոր ենք ճանաչել իրար սովետական շրջանի սահմաններով: Այդպիսի փաստաթուղթ չկա: Ինչու չկա, որովհետև իրավական առումով այդ շրջանները չեն պատկանում Ադրբեջանին, սովետական ժամանակ քաղաքական ինչ-ինչ հաշվարկներով նվիրվել է Ադրբեջանին»,- ասաց Լ.Ալավերդյանը:

Նա նշեց, որ Հայաստանի առաջին քաղաքական էլիտան ժամ առաջ փորձել է և իրականացրել է  Արցախի բեռից ազատվելու քայլը. «Այն, ինչ հիմա տեսնում ենք, շարունակությունն է: Այդ քաղաքականությունը այդ խաղացողների սրտով է»:

Լարիսա Ալավերդյանն իր խոսքն ուղղեց Նիկոլ Փաշինյանին ընտրողներին. «Դուք ձեզ համար պատրաստում եք նոր ցեղասպանություն: Մի կարծեք, որ եթե ձեր արածը զուտ մեկ անձի պաշտամունք է, դուք այսօր նպաստում եք Ադրբեջանին և իր տիրոջը՝ Թուրքիային պատրաստելու և մինչև 2023 թվականն իրականացնելու ու ավարտելու Հայոց ցեղասպանությունը:

Նրանք օգնում են և նպաստում Թուրքային և իր կողմից ստեղծած ցեղասպան Ադրբեջանին ավարտել իրենց հարյուր տարվա ցեղասպանական ռազմավարական նպատակը՝ ավարտել հայերի ցեղասպանությունն ամբողջ այս արևելյան կողմում»:

Դիմելով Նիկոլ Փաշինյանի թիմին՝ հարցադրում արեց, թե արդյոք այդ թիմը հասկանում է, որ իրականացնում է ցեղասպանական այդ ծրագիրը: