Ձեր վստահելի աղբյուրը

«Հարգելի գործընկերներ, ծանրաձողերը երկու օրից՝ ամենաշատը մինչև կիրակի օրը, կլինեն ՀՀ-ում և մեր մարզիկները կսկսեն դրանք գործածել, նրանք ճանապարհի մեծ մասն արդեն անցել են»,- կառավարության նիստում հայտնեց ԿԳՄՍ նախարարի տեղակալ Վահրամ Դումանյանը՝ շեշտելով որ այդ արդյունքը նախորդ նիստում ծանրաձողերի վերաբերյալ քննարկման արդյունքն է:

Անցնելով բյուջեից լրացուցիչ գումար ստանալու մասին զեկուցվող օրակարգային նախագծին՝ ԿԳՄՍ նախարարի պաշտոնակատարը հայտնեց, որ դրանով հնարավորություն է տրվում զոհված և հաշմանդամություն ձեռք բերած զինծառայողների և աշխարհազորայինների, ծնողազուրկ և սակավ ապահովված բազմազավակ ընտանիքների՝ 7-13 տարեկան շուրջ 3200 երեխայի երկու հերթափոխով ամառային հանգիստ անցկացնել մանկական առողջարարական ճամբարներում:

Նրա խոսքով՝ յուրաքանչյուր հերթափոխը կլինի 20 օր տևողությամբ, որում կընդգրկվեն 1600-ական մասնակից, իսկ հանգիստը կկազմակերպվի «Հասմիկ», «Արագած»,  «Հեքիաթային կիրճ»,  «Լավ աղբյուր», «Լուսաբաց», «Գուգարք» ճամբարներում և Հանքավանի «Խորոտ ջուր» առողջարանում:

«Ճամբարների համար անհրաժեշտ ընդհանուր գումարը կկազմի 335 միլիոն դրամ, որից 321,6 միլիոն դրամը կտրամադրվի կազմակերպություններին՝ ամառային հանգիստը կազմակերպելու համար, իսկ 13,4 միլիոն դրամը՝ ՀՀ տարածքային կառավարման և ենթակառուցվածքների նախարարությանը՝ երեխաների՝ մարզերից ճամբարներ տեղափոխման տրանսպորտային ծախսերը հոգալու համար»,-հայտնեց Դումանյանը:

Կառավարությունը ավելի քան 335 մլն դրամ տրամադրեց ԿԳՄՍ նախարարությանը: