Ձեր վստահելի աղբյուրը

«Պարեկային ոստիկանության անձնակազմի 70 -ը նախկինում ոստիկանությունում չեն եղել, այսինքն՝ ոստիկանություն են եկել քաղաքացիական կյանքից»,-կառավարության նիստում հայտարարեց Նիկոլ Փաշինյանը՝ հանրապետության և Երևանի կյանքում շատ կարևոր իրադարձություն համարելով նախորդ օրը պարեկային ոստիկանության գործունեության  մեկնարկը:

Նրա խոսքով՝ այն նոր տիպի և բնույթի ոստիկանություն է թե՛ բովանդակային, թե՛ մարդկային ռեսուրսի իմաստով և բաղկացած է 678 ոստիկանից: 

Փաշինյանը տեղեկացրեց, որ Երևանում հուլիսի 7-ից ճանապարհային ոստիկանությունը դադարեցրել է իր ծառայութունը և գործում է միայն վերջինիս հատուկ ստորաբաժանումը:

«Այն բոլորովին այլ գործառույթ ունի և իրավակարգի պահպանման առումով քաղաքացիների հետ չի հաղորդակցվելու»,- բացատրեց Փաշինյանը՝ ներկայացնելով իր ավտոշարասյունն ուղեկցելու համար պահպանված ճանապարհային ոստիկանության ստորաբաժանման առաքելությունը:

Նա շնորհակալություն հայտնեց ԱՄՆ-ին, Եվրամիությանը և Համաշխարհային բանկին գործընթացին աջակցելու համար, նաև անհատապես շնորհակալություն հայտնեց  Ոստիկանության պետին և տեղակալին, Արդարադատության նախարարի պաշտոնակատարին և նրա տեղակալին, Արդարադատության նախարարության միջազգային հարաբերություների վարչության խորհրդականին, Ոստիկանության ակադեմիայի և պարեկային ոստիկանության պետերին: