Ձեր վստահելի աղբյուրը

Գերմանական «SWR» ռադիո-հեռուստատեսային ցանցը նոր բացահայտումներ է իրականացրել, թե ինչպես են գերմանացի քաղաքական գործիչները լոբբիստական գործունեություն իրականացրել Ադրբեջանի համար։

Նշվում է, որ ներկայիս կանցլեր Անգելա Մերկելի Քրիստոնյա-դեմոկրատական կուսակցության մի քանի քաղաքական գործիչներ քննադատության են ենթարկվել Ադրբեջանի հետ կապերի համար: SWR տեղեկատվության համաձայն, նրանց լոբբինգը շարունակվել է։

«Ադրբեջան փոքր պետությունը հեռու է, բայց ներկայումս այն ավելի հաճախ է վերնագրերում հայտնվում։ Այս շաբաթ Կասպից ծովի բնական գազի հանքավայրում տեղի ունեցավ մեծ պայթյուն: Մինչ այդ, ՈՒԵՖԱ-ն երկրի մայրաքաղաք Բաքվում անցկացնում է Եվրոպայի առաջնության ֆուտբոլի հանդիպումներ: Սա քննադատության է հանդիպել, քանի որ նախագահ Իլհամ Ալիևի ռեժիմը տարիներ շարունակ մեղադրվում է մարդու իրավունքների խախտման և կեղծ ընտրությունների մեջ: Երկար ժամանակ Ալիևը կարիք չուներ անհանգստանալու իր կառավարության իմիջի համար, քանի որ գերմանացի քաղաքական գործիչները ուշագրավ հաճախականությամբ են պաշտպանում պետությանը: SWR փաստաթուղթն այժմ լույս է սփռում դրա վրա»,-գրում է կայքը:

Ադրբեջանի լոբբիստները ճնշում են գործադրել Գերմանիայի արտաքին գործերի նախարարության վրա Լեռնային Ղարաբաղի հարցով

«Բունդեսթագի մի քանի անդամների լոբբիստական աշխատանքը Ադրբեջանի ավտորիտար ռեժիմի համար ավելի հեռահար էր, քան նախկինում էր հայտնի: Ըստ SWR-ի հետազոտության, Բադեն-Վյուրթեմբերգից ՔԴՄ պատգամավորներ Նիկոլաս Լյոբելը, Օլավ Գութինգը, Էբերհարդ Գիենգերը և Աքսել Ֆիշերը, ինչպես նաև այն ժամանակվա պատգամավոր Մարկ Հաուպտմանը «բողոքի նամակով» փորձել են ճնշում գործադրել արտաքին գործերի նախարարության վրա 2019 թ. դեկտեմբերին: SWR-ի ստացած նամակը վերաբերում է Լեռնային Ղարաբաղի տարածաշրջանի շուրջ հակամարտությանը: Պատգամավորները պահանջում են «պարզաբանում» Լեռնային Ղարաբաղի հակամարտության և Հայաստանի ենթադրյալ «ապօրինի» գործողությունների վերաբերյալ:

Մինչ այժմ հայտնի էր միայն, որ հինգ պատգամավորներից չորսը 2019-ի սեպտեմբերին Բունդեսթագում այդ հարցի վերաբերյալ նույնական հարցումներ էին կատարել: SWR-ն վերջերս տեղեկացրեց, որ սրա նախաձեռնությունը եկել է անմիջապես Ադրբեջանի դեսպանատնից: Դեսպանատան աշխատակիցը էլեկտրոնային փոստով գրել է Բունդեսթագի անդամ Էբերհարդ Գիենգերին. «Մենք շատ ուրախ կլինենք, եթե դուք հետևեք այս հարցին և պարոն Լյոբելի հետ միասին ուսումնասիրեք Բունդեսթագի հնարավոր արձագանքները հայկական մոտեցման վերաբերյալ»»,-գրում է կայքը:

Անբացատրելի միամտություն, թե՞ գիտակցված աջակցություն

Կայքը գրում է, որ քաղաքական գործիչները կանգ չեն առել միայն գրավոր հարցման վրա, այլ նաև նամակ են գրել արտաքին գործերի նախարար Հեյկո Մաասին (SPD): Դրանում Բունդեսթագի անդամները բողոքում են, որ Դաշնային կառավարությունը միայն խուսափողական է արձագանքել Բունդեսթագում դրված հարցերին: SWR-ից հարցումներն այն մասին, թե արդյոք այս նամակը նույնպես Ադրբեջանի դեսպանատան նախաձեռնության արդյունք է, Բունդեսթագի պատգամավորները անպատասխան են թողել:

Հայդելբերգի SPD անդամ Լոտար Բինդինգը անհեթեթ է համարել այս մոտեցումը: Նրա համար «միանգամայն անբացատրելի է, որ գործընկերներն այս չափ միամիտ են և չեն տեսնում, թե ինչպես են այնտեղ իրենց բռնության ենթարկում, կամ արել են դա գիտակցաբար, սակայն դա նյարդայնացնող կլինի, քանի որ այդ դեպքում նրանք գիտակցաբար աջակցել են բռնապետությանը»: Բաներ, որ այլեւս ընդհանրապես բացատրելի չէ:

Ներգրավված պատգամավորները SWR-ին չեն հերքել, որ եղել են այդ հարցումները, սակայն նրանք պնդել են, թե ֆինանսական ոչ մի օգուտ չեն ստացել:

Նշվում է, որ ներկայումս դատախազությունը հետաքննում է պատգամավոր Աքսել Ֆիշերի դեմ կոռուպցիայի հավանական գործը: