Ձեր վստահելի աղբյուրը

Կենտրոնական ընտրական հանձնաժողովում այսօր տեղի ունեցավ նիստ, օրակարգում նաև Սահմանադրական դատարանում հունիսի 20-ի ընտրությունների արդյունքներն անվավեր ճանաչելու պահանջով քաղաքական չորս ուժերի դիմումի դատաքննությանը Կենտրոնական ընտրական հանձնաժողովի ներկայացուցիչներին լիազորելու մասին հարցն է:

ԿԸՀ նախագահ Տիգրան Մուկուչյանն ասաց, որ հանձնաժողովի անդամներով առիթ ունեցել են հարցը քննարկելու աշխատանքային կարգով և ներկայացված առաջարկները հիմք ընդունելով էլ կազմվել է որոշման այս նախագիծը:

«Ներկայացված դիմումով պատասխանող հանդես է գալիս ԿԸՀ-ն, ինչով պայմանավորված հանձնաժողովը պետք է կայացնի համապատասխան որոշում  իր ներկայացուցիչներին նշված դիմումի քննության շրջանակներում տալու համապատասխան լիազորություններ ՍԴ-ում հանդես գալու համար:

Առաջարկվում է որոշման նախագծով լիազորել Հայաստանի ԿԸՀ  նախագահ Տիգրան Մուկուչյանին, ԿԸՀ քարտուղար Արմեն Սմբատյանին  և ԿԸՀ անդամ Նունե Հովհաննիսյանին Հայաստանի Սահմանադրական դատարանում մասնակցելու «Հայաստան» կուսակցությունների դաշինքի, «Զարթոնք ազգային քրիստոնեական» կուսակցության, «Հայոց հայրենիք» կուսակցության և «Պատիվ ունեմ» կուսակցությունների դաշինքի դիմումների հիման վրա հունիսի 20-ի արտահերթ ընտրությունների արդյունքներն ամփոփելու մասին վեճի վերաբերյալ  գործերի դատաքննությանը»,-որոշման նախագիծն ընթերցեց Տ. Մուկուչյանը, որը միաձայն ընդունվեց:

Հիշեցնենք, որ ընտրությունների արդյունքներն անվավեր ճանաչելու «Հայաստան» դաշինքի, «Զարթոնք» ազգային քրիստոնեական կուսակցության, «Հայոց Հայրենիք» կուսակցության և «Պատիվ ունեմ» կուսակցությունների դաշինքի դիմումներով գործերը ՍԴ-ում որոշել են միավորել ու քննել նույն նիստում։ ՍԴ-ից հայտնել էին, որ միավորման համար հաշվի է առնվել, որ ՀՀ Կենտրոնական ընտրական հանձնաժողովի 2021 թվականի հունիսի 27-ի` «Հայաստանի Հանրապետության Ազգային ժողովի 2021 թվականի հունիսի 20-ի արտահերթ ընտրությունների արդյունքներն ամփոփելու մասին» թիվ 184-Ա որոշման հետ կապված վեճի վերաբերյալ» գործերը վերաբերում են նույն հարցին։

Միավորված գործի դատաքննությունը կսկսի  հուլիսի 9-ին ժամը 11.00-ին: Ընտրությունների արդյունքներն անվավեր ճանաչելու պահանջով քաղաքական ուժի դիմումների դատաքննությանը կմասնակցի նաև «Քաղաքացիական պայմանագիր» կուսակցությունը: