Ձեր վստահելի աղբյուրը

Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննության ժամանակ ՍԴ դատավոր Հրայր Թովմասյանը դիմեց զեկուցող ՍԴ դատավոր Էդգար Շաթիրյանին՝ հետաքրքրվելով, թե արդյո՞ք առանձնացրել են բոլոր այն փաստական հանգամանքները, որոնք գործի ելքի համար կարող են նշանակություն ունենալ, թե՞ գտնում է, որ դիմումներում ինչ գրված են, բոլորը կարող են նշանակություն ունենալ:

«Արդյո՞ք առանձնացրել եք այն հարցերը, որոնք կողմերը բարձրացրել են, սակայն լրացուցիչ ապացուցման անհրաժեշտություն ունեն: Որո՞նք են այն էական հանգամանքները, որոնք կան գործի նյութերում, որոնք նշանակություն են ունենալու այս գործի ելքի համար»,- հարցադրումներ արեց Հրայր Թովմասյանը:
 
Էդգար Շաթիրյանն արձագանքեց, որ հարցի առնչությամբ ունի նախնական դիրքորոշում, բայց այս փուլում չպետք է բարձրաձայնի:

«Կարծում եմ՝ այս հարցն անկյունաքարային է, և մենք պետք է համատեղ քննարկենք, հակառակ պարագայում չենք կարող առաջ գնալ»,- նշեց զեկուցողը:

Նա ասաց, որ, բնականաբար, դիմողները ներկայացրել են, իրենց գնահատմամբ, առերևույթ խախտումների առնչությամբ համապատասխան ապացույցներ, փաստաթղթեր, տեղեկատվություն, նյութեր, բայց եթե ընդհանուր ձևակերպի, դրանք բոլորը, ըստ նրա, չեն կարող ապացուցողական նշանակություն ունենալ:

«Բացի այդ, նկատի ունենալով դրանց ծավալը՝ հնարավոր չէ այս ամենը դարձնել հետազոտման առարկա»,- ասաց ՍԴ դատավոր Է. Շաթինյանը:

Հիշեցնենք, որ ընտրությունների արդյունքներն անվավեր ճանաչելու «Հայաստան» կուսակցությունների դաշինքի, «Զարթոնք» ազգային քրիստոնեական կուսակցության, «Հայոց Հայրենիք» կուսակցության և «Պատիվ ունեմ» կուսակցությունների դաշինքի դիմումներով գործերը ՍԴ-ում որոշել են միավորել ու քննել նույն նիստում։

ՍԴ-ից հայտնել էին, որ միավորման համար հաշվի է առնվել, որ ՀՀ Կենտրոնական ընտրական հանձնաժողովի 2021 թվականի հունիսի 27-ի` «Հայաստանի Հանրապետության Ազգային ժողովի 2021 թվականի հունիսի 20-ի արտահերթ ընտրությունների արդյունքներն ամփոփելու մասին» թիվ 184-Ա որոշման հետ կապված վեճի վերաբերյալ» գործերը վերաբերում են նույն հարցին։

Այս գործով դատաքննությունը սկսվել է այսօր ժամը 11:00-ից: