Ձեր վստահելի աղբյուրը

ԲԴԽ նախագահ Ռուբեն Վարդազարյանը, ում լիազորություններն այս պահին կասեցված են,  ֆեյսբուքյան իր էջում մանրամասներ է ներկայացրել իր հայցի վերաբերյալ դատարանի որոշման մասին։

Նա գրում է.

«Երեկ ստացա դատարանի օրինական ուժի մեջ մտած ծավալուն որոշումը, որով դատարանը վարույթն իրականացնող մարմնին պարտավորեցրել է վերացնել իմ, որպես դատավորի և ԲԴԽ նախագահի իրավունքների և օրինական շահերի խախտումները:

Վստահ եմ, որ դատավոր Դավիթ Հարությունյանի բարձր պրոֆեսիոնալիզմը տեսանելի է ոչ միայն ինձ, այլ նաև անկողմնակալ ու կողմնակալ անձանց»։

Ավելի վաղ Վարդազարյանի փաստաբան Հովհաննես Խուդոյանը դատարանի որոշման մասին գրել էր.

«Էսօր ստացել եմ դատավոր Հարությունյանի որոշումը` ԲԴԽ նախագահի մեղադրանքի ոչ օրինական լինելու վերաբերյալ։ Շատ ավելի դիտարժան էր, քան Եվրո-2020ը»։

Հիշեցնենք, որ այս տարվա ապրիլի 15-ին Բարձրագույն դատական խորհուրդը (ԲԴԽ) որոշում է կայացրել Ռուբեն Վարդազարյանի լիազորությունները կասեցնել որպես դատավոր և որպես ԲԴԽ անդամ (նախագահ)՝ մինչև վերջինիս նկատմամբ հարուցված քրեական գործով վարույթի ավարտը։

Բարձրագույն դատական խորհրդի նախագահի պարտականություններն իրականացնում է  Խորհրդի տարիքով ավագ անդամ՝ Բարձրագույն դատական խորհրդի գիտնական-անդամ Գագիկ Ջհանգիրյանը:

Վարդազարյանի նկատմամբ իշխանությունների վերաբերմունքը փոխվեց, երբ նոյեմբերի 9-ի փաստաթղթի ստորագրմնաը հաջորդած մասայական ձերբակալությունների ժամանակ՝ նոյեմբերի 15-ին ԲԴԽ նախագահը կոչով դիմեց հայաստանյան դատավորներին` հորդորելով զերծ մնալ քաղաքական ճնշումներից ու ազդեցություններից։

«Եկել է պահը տալու «ամոթալի չարաբաստիկ հարցի պատասխանը. մենք պատերի տակ վնգստացող դատավորնե՞ր ենք, թե՞ հայրենիքին նվիրված ազնիվ պրոֆեսիոնալներ»»,-ասել էր նա։