Ձեր վստահելի աղբյուրը

«Սահմանադրական դատարանի դատավորների հարցուպատասխաններից, նաև մեր կողմից արձանագրված որոշ փաստերից մեզ մոտ անհանգստության առաջացավ այն առումով, որ սույն գործը  պատշաճ նախապատրաստված չէ դատաքննության»,-Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննությանը բացատրություններով հանդես գալով ժամանակ ասաց «Զարթոնք» ազգային քրիստոնեական կուսակցության գործադիր մարմնի ղեկավար Արա Զոհրաբյանը։

Նա նշեց, որ չի քննարվել ու քվեարկության չի դրվել «Զարթոնք» ազգային քրիստոնեական կուսակցության միջնորդությունները։

«Մեր դիմումի տեքստում նշել էինք 5 միջնորդություն, առ այսօր որևէ որոշում չունենք։ Մինչդեռ արձանագրել ենք, որ Սահմանադրական  դատարանն աշխատակարգային որոշումներով անդրադարձել է  այլ դիմողների միջնորդություններին։ Մեր միջնորդություններն անտեսվել են, դրանք ուղղված էին պետական մարմիններից  որոշակի տեղեկություններ պահանջելուն, հատուկ էինք դիմումի հետ ներկայացրել, որ ժամանակը տնտեսեինք»,- ասաց Արա Զոհրաբյանը։

Հիշեցնենք, որ ընտրությունների արդյունքներն անվավեր ճանաչելու «Հայաստան» դաշինքի, «Զարթոնք» ազգային քրիստոնեական կուսակցության, «Հայոց Հայրենիք» կուսակցության և «Պատիվ ունեմ» կուսակցությունների դաշինքի դիմումներով գործերը ՍԴ-ում  միավորել են ու  քննում են նույն նիստում։ ՍԴ-ից հայտնել էին, որ միավորման համար հաշվի է առնվել, որ ՀՀ Կենտրոնական ընտրական հանձնաժողովի 2021 թվականի հունիսի 27-ի` «Հայաստանի Հանրապետության Ազգային ժողովի 2021 թվականի հունիսի 20-ի արտահերթ ընտրությունների արդյունքներն ամփոփելու մասին» թիվ 184-Ա որոշման հետ կապված վեճի վերաբերյալ» գործերը վերաբերում են նույն հարցին։
Այս գործով դատաքննությունը սկսվել է հուլիսի 9-ից։ 

Արա Զոհրաբյանի բացատրությունները՝ ուղիղ եթերում։