Ձեր վստահելի աղբյուրը

ՀՀ վարչական վերաքննիչ դատարանը 09.07.2021թ․ որոշմամբ ամբողջությամբ բավարարել է ՀՀ Վայոց ձորի մարզի Ջերմուկ քաղաքի և Գնդեվազ բնակավայրի 19 բնակիչների ներկայացուցիչ, փաստաբան Նազելի Վարդանյանի վերաքննիչ բողոքը Ամուլսարի գործով: Panorama.am-ի հետ զրույցում Նազելի Վարդանյանը սա համարեց Ամուլսարի գործով առաջին հաջողությունը։

«Վերաքննիչ բողոքը բավարարվել է ամբողջ ծավալով և ուղարկվել է  Առաջին ատյանի դատարան՝ նոր քննություն անցնելու։ Հիմնավորումն այն է, որ  2019 թվականի առաջին ատյանի դատարանի վճիռը փաստորեն անհիմն և անօրինական է եղել, այդ պատճառով բեկանվել է։ Հիմա նոր քննություն կսկսվի»,- ասաց փաստաբանը։
  
Ջերմուկի և Գնդեվազի համայնքների 19 բնակիչները դեռ  2018թ-ին  հայց էին ներկայացրել ՀՀ վարչական դատարան՝ ընդդեմ ՀՀ բնապահպանության նախարարի։ Նրանք պահանջել են պարտավորեցնել ՀՀ բնապահպանության նախարարին ուժը կորցրած ճանաչել Ամուլսարի ոսկեբեր քվարցիտների հանքավայրի հանքարդյունահանման համալիրի փոփոխված նախագծի՝ շրջակա միջավայրի վրա ազդեցության պետական փորձագիտական եզրակացությունը և ՀՀ բնապահպանության նախարարի 29.04.2016թ․ դրա հաստատումը։

Վարդանյանի խոսքով ՝ մինչ Վարչական դատարանն էլ , դիմել էին այն ժամանավա  Բնապահպանության նախարարին ՝ նոր ի  հայտ  եկած էկոլոգիական գործոնների հիման վրա փորձաքննական եզրակացությունը ուժը կորցրած ճանաչելու խնդրանքով։ Սակայն Նախարարությունից առհասարակ պատասխան չի եղել։ Այունհետև սահմանված ժամկետներում , իրավաբանը դիմել է ՀՀ վարչական դատարանը ,որն էլ  հայցը մերժել է։ Նազելի Վարդանյանի համոզմամբ ՝ դատարանի մերժումն  անհիմն էր և այդ հիմքով բողոքարկել է ՀՀ վերաքննիչ վարչական դատարան։ Վերջինս էլ բավարարել է հայցը։

«Ամուլսարի գործով դատական առաջին դեպքն է, երբ հաջողություն է ունեցել։ Երեք տարի այս գործով ենք զբաղված և հինգ տարի էլ մեկ այլ ՝ թույլտվություններն անվավեր ճանաչելու հայցով՝ կրկին տեղի բնակիչների կողմից։ Այս գործը դեռևս վարչական դատարանում է, վարչական ակտ դեռ չունենք»,- ասաց Վարդանյանը։

Փաստաբանի փոխանցմամբ՝ Ամուլսարի հետ կապված կան նաև քրեական գործեր, վարչական վարույթներ, զրպարտության գործեր, ինչպես նաև քրեական վարույթներ, որոնք ընթացքում են և դեռ դատարան չեն մտել։

Չնայած այն բանին, որ  տարիներ շարունակ Ամուլսարի ծրագիրը եղել է հանրային ուշադրության կենտրոնում և որի շուրջ ձևավորվել է  զանգվածային աղմուկ, այդուհանդերձ ակնհայտ է նաև այն, որ Ամուլսարի ծրագիրը շահագործողները ևս չեն շտապում շահագործել  այն։

Փաստ է, որ ավելի քան մեկ տարի հանքավայրը շահագործելու հնարավորություն ունեն, այսինքն՝չկան փակ ճանապարհներ և չկան խոչընդոտող հանգամանքներ, սակայն չեն շահագործում, ինչո՞ւ։ 

«Նրանք ունակ չեն որևէ բան անելու։ Չշահագործելու պատճաառը չգիտեմ ինչն է, բայց տարածքը վերցրել են, ինչ-որ բաներ արել են, սակայն զբաղեցնելով պետական հողը, պետությանն օգուտ չեն տալիս։ Այն դեպքում, երբ 4 անգամ դրական փորձաքննական եզրակացություն են ստացել։ Այսինքն՝ անընդհատ ստեղծվել են իրենց համար բարենպաստ պայմաններ աշխատելու, սակայն ոչ մի բան չի արվել»,- կարծիք հայտնեց փաստաբանը։

Նրա խոսքով՝  օրենքով սահմանված է, որ եթե կազմակերպությունը մեկ տարվա ընթացքում, փորձաքննական եզրակացություն ստանալուց հետո ,  չի սկսում այն գործունեությունը, որի համար ստացել է եզրակացություն, փաստաթուղթը կորցնում է ուժը։ Այսինքն՝ 4 փորձաքննական եզրակացություններն էլ  մեխանիկորեն ուժը կորցրել են։