Ձեր վստահելի աղբյուրը

«Հայաստանի ժողովուրդը կարող է մի օր քաղաքական մի ուժի տալ ձայների 95 տոկոսը։ Այդ ժամանակ հարց է առաջանում՝ իսկ ի՞նչ է լինելու զսպումների և հակակշիռների  մեխանիզմի, ժողովորդավարության սկզբունքի հետ»,-Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննությանն ասաց «Հայաստան» դաշինքի ներկայացուցիչ Արամ Վարդևանյանը:

Նա նշեց, որ ժողովուրդը կարող է նման որոշում կայացել, բայց  մյուս կողմից ստացվում է  վերահսկողական ժողովրդավարության մեխանիզմներից և ոչ մեկ չեն գործելու։

«Այդ իրավիճակի կանխարգելման  համար նախատեսված է  ընդդիմության պարտադիր մասնակցությունը 1/3-ի՝ 30  տոկոսի չափով։ Ըստ էության, 2018-ին կարծես այդ վիճակն եղել է, քանի որ 70 տոկոսից ավելին էր ստացել ուժերից մեկը, բայց ստացվում էր, որ որոշակի զսպման մեխանիզմ գործում էր։

Սահմանադիրը փաստաթուղթը դնելով հանրաքվեի՝ ի՞նչ նպատակ է ունեցել։ Նպատակ է ունեցել ընդդիմադիր ուժերի դերերի բարձրացում, դրա միջոցը տեսել է 3/5-րդի գործիքի ներդրման մեջ։ Ստացում է,  որ սահմանադրի դրած հիմնավորումը ոտնահարվել է։

Սա սահմանադրաիրավական խնդիր է»,- ասաց Արամ Վարդևանյանը։

Նա ընդգծեց, որ 71 մանդատ տալով մեկ ուժի 107-ի համագումարի մեջ՝ Կենտրոնական ընտրական հանձնաժողովը երաշխավորում է  ժողովրդավարության դեֆիցիտը։

«Սահմանադրականությունը գնահատելուց ո՞նց կարող է Բարձր դատարանը զերծ մնալ այն իրավիճակից, որ Սահմանադրությունը, որի երաշխավորումն ապահովում է Բարձր դատարանը,  նախատեսել է 3/5-րդն, ինչը ընդդիմադիրների դերը բարձրացնելու համար է, բայց փաստացի այսօր Բարձր դատարանի սեղանին դրված ընտրական արդյունքների վեճի վերաբերյալ որոշմամբ այդ հիմնավորումը կյանքի չի կոչվում, խաթարվում է, ստացվում է սահմանադիրը մի հիմնավորում է դրել, որը որևէ առնչություն չունի իրական կյանքի հետ։

Եթե այս վեճը լուծվի այնպես, որ պարզապես անփոփոխ մնա, բա սա սահմանադրականության խնդիր չէ՞, որը հենց Բարձր դատարանը պետք է գնահատի հենց այս վարույթով։ Հակառակ դեպքում, Բարձր դատարան, ունենալու ենք աբստրակտ սահմանադրական վերահսկողության շրջանակներում լուծում, որը որևէ փոփոխություն չի տալու»,- ասաց «Հայաստան» դաշինքի ներկայացուցիչը։

Դատական նիստի ընթացքը՝ ուղիղ եթերում։