Ձեր վստահելի աղբյուրը

«Սահմանադրական դատարանի դատավորը պարտավոր է ղեկավարվել Սահմանադրությամբ և Սահմանադրական օրենքի մասին օրենքով, ոչ թե ՍԴ դատավորների մեծմասնության կողմից տրված մեկնաբանությամբ»,- Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննությանն ասաց Սահմանադրական դատարանի դատավոր Արևիկ Պետրոսյանը։

Նա նշեց, որ Սահմանադրական դատարանի գործողությունները և դատական իշխանությունը վարկաբեկող համապատասխան տեսակետներ և մեկնաբանություններ են հնչել ՍԴ դատավորներից մեկի կողմից և որ մեկ տարի և ավելի է, ինչ այդ դատավորը նման  վարքագիծ է դրսևորել։

Արևիկ Պետրոսյանին արձագանքեց ՍԴ դատավորներից Վահե Գրիգորյանը. «Դատավոր Պետրոսյանի խոսքը քողարկված ակնարկներ էր պարունակում իմ, իր վարքի վերաբերյալ։ Ուզում եմ Հայաստանի քաղաքացիներից և կողմերից ներողություն խնդրել այն ամենի համար, ինչ լսում եք, ականատես եք այստեղ։ Վստահ եմ, որ Հայաստանն արժանի է շատ ավելի այլ վարք դրսևորող Սահմանադրական դատարանի։ Խնդրում եմ անտեսել այդ ամենը ու անցնել գործի քննությանը, ողջ Հանրապետությունը սպասում է  այս գործով որոշում, ինչպիսի որոշում էլ լինի»։

Արևիկ Պետրոսյանը դիմեց ՍԴ նախագահ Արման Դիլանյանին, որպեսզի  վկայակոչի հնչեցված մտքի վերաբերյալ Սահմանադրական դատարանի մասին օրենքի 14-րդ հոդվածի 7-րդ կետը՝ ուղիղ վարկաբեկում էր ՍԴ-ին ու դատական իշխանությանը։

Դատավոր Էդգար Շաթիրյանն առաջարկեց  անհապաղ ավարտել բանավեճն ու անհապաղ անցնել գործի բուն քննությանը, հակառակ պարագայում՝ հանրությունն արդեն տևական ժամանակ դիտում է իրեն ներքին բանավեճը։