Ձեր վստահելի աղբյուրը

«Ծրարը, որի մեջ դրվել է քվեաթերթիկը, թափանցիկ է եղել, երևացել է, թե ում է ընտրել տվյալ քաղաքացին»,- Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննությանը բացատրություններով հանդես գալու ժամանակ ասաց «Զարթոնք» ազգային քրիստոնեական կուսակցության գործադիր մարմնի ղեկավար Արա Զոհրաբյանը։

Նա նշեց, որ այս պայմաններում, երբ որ մարդն ընտրության է գնում, մտահոգություն է ունենում,  որ կարող են իմանալ՝ ում  է ընտրել, վախի գործոնն ավելի մեծ դերակատարում է ունենում անձի վրա։

ՍԴ դատավոր Հրայր Թովմասյանը խնդրեց Կենտրոնական ընտրական հանձնաժողովին, որը ՍԴ-ում ներկայացնում է  ԿԸՀ նախագահ Տիգրան Մուկուչյանը, վաղը դատարանին մեկ ծրար ու քվեաթերթիկ ներկայացնել, եթե նմուշներն ունեն։

ՍԴ դատավոր Երվանդ Խունդկարյանը նշեց, որ Արա Զոհրաբյանի՝ դիմումին կցված լուսանկարում հստակ երևում է, որ ծրարը թափանցիկ է։

Հիշեցնենք, որ ընտրությունների արդյունքներն անվավեր ճանաչելու «Հայաստան» դաշինքի, «Զարթոնք» ազգային քրիստոնեական կուսակցության, «Հայոց Հայրենիք» կուսակցության և «Պատիվ ունեմ» կուսակցությունների դաշինքի դիմումներով գործերը ՍԴ-ում  միավորել են ու  քննում են նույն նիստում։ ՍԴ-ից հայտնել էին, որ միավորման համար հաշվի է առնվել, որ ՀՀ Կենտրոնական ընտրական հանձնաժողովի 2021 թվականի հունիսի 27-ի` «Հայաստանի Հանրապետության Ազգային ժողովի 2021 թվականի հունիսի 20-ի արտահերթ ընտրությունների արդյունքներն ամփոփելու մասին» թիվ 184-Ա որոշման հետ կապված վեճի վերաբերյալ» գործերը վերաբերում են նույն հարցին։
Այս գործով դատաքննությունը սկսվել է հուլիսի 9-ից։ 

Դատական նիստն այսօր ավարտվեց, այն կշարունակվի վաղը ժամը 10։00-ից։