Ձեր վստահելի աղբյուրը

«Մեր դիմումում ներկայացված հիմքերը բավարար են ընտրությունների արդյունքներն անվավեր ճանաչելու համար, բայց մեր նպատակն է  անդրադառնալ այս ընտրությունների ժամանակ ի հայտ եկած այլ ֆունդամենտալ արարքներին ևս»,- Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննության ասաց «Պատիվ ունեմ» դաշինքի ներկայացուցիչ Դավիթ Հարությունյանը։ 

Նրա խոսքով, իրենց նպատակը միայն այն չէ, որ հասնեն ընտրության արդյունքներն անվավեր ճանաչվեն, այլ նպատակն այն է, որ Սահմանադրական դատարանը գնահատական տա բոլոր այն արատներին, որոնց շարունակումը հետագայում, կրկնությունը մեր երկրի  ճակատագրի վրա կունենա ծայրահեղ բացասական ազդեցություն։

Դ. Հարությունյանն ասաց, որ Փաշինյանի մասնակցությամբ ՔՊ կուսակցության նախընտրական քարոզչությունն ու հավաքներին ուղեկցվել են ոստիկանության և անվտանգության աշխատակիցների գերլայնածավալ ներգրավածությամբ և ուժի ցուցադրմամբ։

«Այստեղ հարց է ծագում՝ արդյո՞ք այդ փուլում Փաշինյանը օրինական հիմքերով էր զբաղեցնում վարչապետի ժամանակավոր պաշտոնակատարի պաշտոնը։

Հենց այս հարցն ենք առաջադրում Սահմանադրական դատարանի լուծմանը, որովհետև եթե այդ հարցի պատասխանը լինի «ոչ», դա նշանակում է, որ այն վարչական  ռեսուրսը,  որն օգտագործել է  Փաշինյանը որպես օրինական, իրականում ապօրինի է։

Այսպիսով այս հարցը՝ արդյո՞ք այդ փուլում Փաշինյանը օրինական հիմքերով էր զբաղեցում վարչապետի ժամանակավոր  պաշտոնակատարի պաշտոնը թե ոչ, էական նշանակություն ունի այս գործի հանգուցալուծման համար»,- ասաց նա։

Դավիթ Հարությունյանն ընդգծեց՝ իրենց խորին համոզմամբ, Նիկոլ Փաշինյանը հրաժարական տալուց հետո չէր կարող զբաղեցնել  վարչապետի պաշտոնակատարի պաշտոնը՝ ներկայացնելով հիմնավորումներ, մեջբերումներով անելով Սահմանադրությունից ու համապատասխան օրենքներից։

Իր ելույթի վերջում Դավիթ Հարությունյանը խոսքն ուղղեց Բարձր դատարանին. «Մենք իրականում կանգնած ենք ճամփաբաժնի առջև։ Ճանապարհներից մեկը նշված  խախտումների լեգիտիմացումն է, որը անդառնալի վնաս կհասցնի Հայաստանի ժողովրդավարական ճակատագրին։

Վստահ եմ, որ Բարձր դատարանը կընտրի երկրորդ ճանապարհը»։