Ձեր վստահելի աղբյուրը

«Ընտրական գործընթացի հետ կապված, երբ մենք ասում էինք, որ եղել են խախտումներ, շատերն ասում էին, որ դա, միգուցե, մեր սուբյեկտիվ գնահատկանն է կամ դեռ փաստեր չկան: Արդեն կան և դա արձանագրված է: Այլևս պետք է այդ տեսանկյունից նայենք իրավիճակին»,- ՍԴ-ում  լրագրողների հետ զրույցում ասաց Սահմանադրական դատարանում «Հայաստան» դաշինքի ներկայացուցիչ Արամ Վարդևանյանը:

Ըստ նրա, եթե այսչափ ընտրակեղծիքներ չլինեին, կարող են ասել, որ որակապես լրիվ այլ պատկեր էին ունենալու. եթե ցուցակները լինեին պատշաճ, եթե ընտրվողների ընդհանուր թվի անձնագրերն աշխատեին:

Ա.Վարդևանյանը նշեց, որ ԿԸՀ նախագահ Տիգրան Մուկուչյանի հետ հարց ու պատասխանի ընթացքում պարզվել է, թե ովքեր են ներմուծում այդ չաշխատող անձնագրերի տվյալները. 
«Մասնագետները, իսկ մասնագետները առավելապես աշխատում են պետական համակարգում: Այն նույն պետական համակարգում, որի կողմից վարչական ռեսուրսի չարաշահման նման լուրջ խնդիրներ ենք արձանագրել: Հիմա ինչպե՞ս կարող ենք վստահությամբ մոտենալ նշված գործընթացին, չենք կարող: Կասկածի տակ ենք դնում և պնդում ենք այդ կասկածը»: 

«Հայաստան» դաշինքի ներկայացուցիչն ընդգծեց՝ իրենց կարծիքով, ընտրության արդյունքները պետք է անվավեր ճանաչել, դրանից հետո ՍԴ-ն կարող է երեք տեսակի որոշում ընդունել՝ ընտրության արդյունքների անվավերություն, երկրորդ փուլի նշանակում, մանդատների բաշխման կարգի սահմանում նոր ձևով:

«Մենք երեքն էլ պնդում ենք, բայց գտնում ենք, որ ելակետը՝ ԿԸՀ որոշումը պետք է անվավեր ճանաչվի: Մենք սա պնդում ենք, և կարծում ենք մյուս երեք ուժերն էլ իրենց հիմնավորումներով, կից ներկայացրած փաստական տվյալներով ակնհայտ են դա դարձնում»,- ասաց Արամ Վարդևանյանը:

Հիշեցնենք, որ ընտրությունների արդյունքներն անվավեր ճանաչելու «Հայաստան» դաշինքի, «Զարթոնք» ազգային քրիստոնեական կուսակցության, «Հայոց Հայրենիք» կուսակցության և «Պատիվ ունեմ» կուսակցությունների դաշինքի դիմումներով գործերը ՍԴ-ում միավորել են ու  քննում են նույն նիստում։

ՍԴ-ից հայտնել էին՝ միավորման համար հաշվի է առնվել, որ ՀՀ Կենտրոնական ընտրական հանձնաժողովի 2021 թվականի հունիսի 27-ի` «Հայաստանի Հանրապետության Ազգային ժողովի 2021 թվականի հունիսի 20-ի արտահերթ ընտրությունների արդյունքներն ամփոփելու մասին» թիվ 184-Ա որոշման հետ կապված վեճի վերաբերյալ» գործերը վերաբերում են նույն հարցին։

Այս գործով դատաքննությունը սկսվել է հուլիսի 9-ից։