Ձեր վստահելի աղբյուրը

«Մեր նշած խախտումները համակարգային են և տարածվել են ամբողջ հանրապետության տարածքում։ Այս ընտրություններն ամենաաննախադեպ և խայտառակ ընտրություններն էին»,- ՍԴ-ում ընդմիջման ժամանակ լրագրողներին ասաց «Հայոց հայրենիք» կուսակցության ներկայացուցիչ Արտակ Գալստյանը։

Ըստ նրա, ամենահետաքրքիրն այն է, որ առաջին անգամ ընտրությունները կեղծված լինելու մասին խոսել է Նիկոլ Փաշինյանը հունիսի 19-ին իր լայվով՝ համարելով, որ տեղի է ունեցել աննախադեպ քանակի ընտրակաշառքներ և ընտրական այլ խախտումներ:

«Ուղղակի ես չեմ հասկանում այդ պարագայում, եթե Նիկոլ Փաշինյանը հայտարարում է, որ աննախադեպ քանակի ընտրակաշառքներ կան, ինչո՞ւ հենց ինքը չի վիճարկում ընտրության արդյունքները:

Իշխանության ներկայացուցիչը հայտարարում է, որ մինիմում երկու կուսակցություն աննախադեպ քանակի ընտրակաշառք են բաժանել: Հարուցել են քրգործեր, մարդկանց են կալանավորել և այլն: Մյուս կողմն էլ մեղադրում է իրեն վարչական ռեսուրսներ օգտագործելու մեջ: Այսինքն՝ երեք հիմնական խաղացողներ ներկայացնում են ապացույցներ, որ խայտառակ ընտրություններ են եղել:

Առերևույթ այն կուսակցությունները, որոնք բաժանել են ընտրակաշառք, ասում են՝ հա, ոչինչ, անվավեր ճանաչեք ընտրությունները, իսկ այն ուժը, որ ներկայանում է, որ ինքը սուրբ կույս Մարիամն է, ասում է՝ թող այս կեղտոտ ընտրությունները մնան, այս ընտրակաշառքով ընտրված մարդիկ էլ մնան Ազգային ժողովում: Մի քիչ անտրամաբանական է»,- ասաց Ա.Գալստյանը:

Նրա խոսքով, ընտրախախտումները տեղի են ունեցել ի սկզբանե, օրենքի փոփոխության արդյունքում, պլանավորված և համակարգված:

«Սա արվել է արդեն իշխանության կողմից, որովհետև ոչ Ռոբերտ Քոչարյանը, ոչ Սերժ Սարգսյանը, ոչ էլ մյուս կուսակցությունները բարցարձակապես զրկված են եղել այդ լծակներից, որպեսզի կարողանային այս մասշտաբի կեղծեին: Վարչական ռեսուրսի չարաշահումը ամենափոքրն է, որ կարելի է մեղադրել այսօրվա իշխանություններին:

Իմ սուբյեկտիվ կարծիքով, տոտալ կարգի ընտրողների վերահսկողության մեխանիզմ է դրվել: Այսինքն՝ իշխանությունը հստակ իմացել է՝ մարդիկ ոնց են քվեարկում, ըստ դրա էլ հնարավորություն է ունեցել կառավարելու»:

Հիշեցնենք, որ ընտրությունների արդյունքներն անվավեր ճանաչելու «Հայաստան» դաշինքի, «Զարթոնք» ազգային քրիստոնեական կուսակցության, «Հայոց Հայրենիք» կուսակցության և «Պատիվ ունեմ» կուսակցությունների դաշինքի դիմումներով գործերը ՍԴ-ում միավորել են ու  քննում են նույն նիստում։

ՍԴ-ից հայտնել էին՝ միավորման համար հաշվի է առնվել, որ ՀՀ Կենտրոնական ընտրական հանձնաժողովի 2021 թվականի հունիսի 27-ի` «Հայաստանի Հանրապետության Ազգային ժողովի 2021 թվականի հունիսի 20-ի արտահերթ ընտրությունների արդյունքներն ամփոփելու մասին» թիվ 184-Ա որոշման հետ կապված վեճի վերաբերյալ» գործերը վերաբերում են նույն հարցին։

Այս գործով դատաքննությունը սկսվել է հուլիսի 9-ից։