Ձեր վստահելի աղբյուրը

Երևանի ժառանգության պաշտպանության կոմիտեի անդամները Երևանի Հանրապետության 46 հասցեում գտնվող հուշարձան-շենքի մոտ են հավաքվել՝ փորձելով պարզել, թե ինչ ճակատագրի է արժանանալու պետության կողմից պահպանվող հուշարձանը:

Լրագրողների հետ զրույցում Սեդա Գրիգորյանն ասաց, որ 19-րդ դարի վերջին կառուցված բնակելի շենքը Ֆիրդուսի թաղամասի կառուցապատման ծրագրում է ընդգրկված:

«Նախորդ տարի բազմիցս բարձրաձայնել ենք այս կառուցապատման ծրագրի խնդիրների մասին՝ բաց մրցույթ չի եղել, 2015 թվականին նախարար եղած ժամանակ Նարեկ Սարգսյանը  նախագիծը բերել ու անցկացրել է, այդպես էլ մնացել է փոքրիկ փոփոխություններով: Խնդրահարույց նախագիծը մինչ օրս դրված է սեղանին, իրականացման ընթացքի մեջ է, վերջին տարիներին հարուցել է քաղաքացիների բողոքը»,- նշեց նա:

Ս. Գրիգորյանի խոսքով, հուշարձան-շենքի հետ կապված դեռ նախորդ տարի նախագիծն ուսումնասիրելիս նկատել էին՝ շենքը պետք է ենթարկվի փոփոխությունների, տպավորություն էր, որ մի փոքր տեղաշարժված է, հարկեր են բարձրանալու, միայն ֆասադային հատվածն է մնում:

«Մեր պետությունում տարիներ շարունակ գործում է հանցավոր մոտեցում հուշարձանների հանդեպ՝ պահել միայն ֆասադն այն էլ կամայական փոփոխությունների ենթարկելով ու այդպես համարելով, որ հուշարձանը պահել են:

Հուշարձանը հուշարձան է իր տեղակայման վայրով, ամբողջությամբ:

Ունենք ֆասադները պահպանելու պրակտիկայի ցավալի, ողբալի նախադեպ: Շատ դեպքերում փորձել են պահպանել աղճատված ձևով, շատ դեպքերում չեն էլ վերականգնել, օրինակ Աֆրիկյանների տունը»,- նշեց նա:

Ս. Գրիգորյանը հայտնեց, որ 2-3 օր առաջ լուրեր են սկսել շրջանառվել, թե շենքն ապամոնտաժելու թույլտվություն է տրվել, թողնվելու է միայն ֆասադը կամ նույնիսկ ֆասադն էլ ապամոնտաժելու են ու հետո հավաքելու:

«Հակված եմ այն մտքին, որ նախատեսում են հետ հավաքել մի քիչ տեղաշարժած, քանի որ այս հատվածում պետք է մուտք լինի դեպի 33 թաղամաս»,- ասաց նա:

Սոնա Գրիգորյանն ասաց, որ այս մասին տեղեկացել են շաբաթ-կիրակի օրերին, սպասում են այսօրվա մեջ իրենց կտեղեցանեն, թե ինչ են նախատեսում անել հուշարձանի հետ:

Ս.Գրիգորյանն իր ֆեյսբուքյան էջում նաև գրել է. 

«Կապալառու կազմակերպության ներկայացուցիչն ասաց, որ

- հարկ չեն ավելացնելու

- պահելու են շենքի ֆասադն ու 6մ խորությամբ կառույցը

- ամրակայելու են շենքը

Ես էլ իր համար կարդացի էս տարվա մարտին «Հետքում» տպագրված էս հոդվածից` հենց իրենց կազմակերպության նախագծում գրված նկարագիրը. կամերաների առաջ ասաց` էդպիսի բան չկա։

Հուշարձանը քանդելու ոչ մի արդարացում ընդունելի չի, հուշարձանը մենակ ֆասադը չի կամ մի քանի մետրը, այլ` կառույցն իր ամբողջականությամբ. իսկ պարոնը ոչ նախագիծ, ոչ կառուցապատման մոդելային նկար չներկայացրեց, "ազնիվ խոսք"-ով ուզում էր, որ հավատանք ակնհայտ կեղծիքին.

Մեջբերում հոդվածից՝
«Երեք տարածքներում ընկերությունը նախատեսել է բազմաֆունկցիոնալ բնակելի մեծ համալիր կառուցել: Ողջ հողամասի մակերեսը 3207 քմ է, իսկ կառուցապատման մակերեսը` 2586: Կառույցը նախատեսվում է 9 և 12 հարկանի, համապատասխանաբար 30 և 45 մ բարձրությամբ: 1-3 հարկերը նախատեսված են գրասենյակային տարածքների և խանութների համար: 4-12-րդ հարկերը` բնակարաններ են լինելու:

Հուշարձան կառույցի կրող պատերի սխեման թելադրում է նոր կառույցի սյունացանցի տեղակապումը և համապատասխանաբար դեպի Հանրապետության փողոց նայող արտաքին պատի տեղը: Առանցքի հեռավորությունը հուշարձանի ճակատից կազմում է 6 մ: Նույն լուծումը տրված է դիտարկվող հուշարձանի դիմաց գտնվող հուշարձան-նոր կառույց հորինվածքում: Այնտեղ ևս նոր 8 հարկանի շենքի ճակատը տեղադրված է հուշարձանից մոտ 6 մետր հեռավորության վրա:

«Մենք առաջարկում ենք հուշարձանն ամբողջովին ընկալելի դարձնել մարդկանց համար: Այդ նպատակով նորակառույցի հուշարձանին կից հատվածները՝ ընդհանուր առմամբ 3 հարկ, նախատեսվում է թափանցիկ ապակի: Կազմակերպվում է մեծ, ատրիումային տարածություն, ձմեռային այգի, որտեղից բացվում է հուշարձանի վերակառուցված բակային ճակատը: Բակը նախատեսվում է օգտագործել որպես սրճարան-ռեստորան: Նստատեղեր կլինեն նաև հուշարձանի պատշգամբներում և շենքում մասնակի: Շենքի մնացած հատվածները կօգտագործվեն որպես ռեստորանի խոհանոց և սպասարկման տարածքներ»,- արձանագրել են նախագծողները»»: