Ձեր վստահելի աղբյուրը

Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու գործով դատաքննությանը ՍԴ դատավոր Հրայր Թովմասյանը դատախազության ներկայացուցչին հարցով դիմեց Սյունիքի մարզի Որոտան վարչական շրջանի բնակիչների բարձրաձայնած խնդրի վերաբերյալ:

Նա նշեց, որ համացանցում տեսանյութ է շրջանառվում, Որոտանի բնակիչների խոսքերով, համայնքի ղեկավարից իրենց դիմումների համաձայն ստացել են համապատասխան օգնություն, իսկ հիմա, ով օգնություն է ստացել, կանչում են հարցաքննության՝ արդյո՞ք սա ընտրակաշառք չի, արդյո՞ք իրենց չեն տվել այդ օգնությունը ինչ-որ բանի համար:

Հ. Թովմասյանը նշեց, որ Որոտանի բնակիչների խոսքից ակնհայտ է՝ իրենք նման բան չեն ասել, որ իրենց ընտրակաշառք է առաջարկվել, ընդհակառակը՝ հերքում են, որ իրենց ընտրակաշառք են առաջարկել:

«Հաստատեք կամ հերքեք՝ արդյո՞ք նման երևույթ կա, որ եթե ինչ-որ մեկն օգնություն է ստացել, գնում և հարցնում են, արդյո՞ք ունի սահմանափակվածություն, միայն այս համայնքում է, թե՞ դատախազությունը կամ իրավապահ մարմիններն ընտրությունները նշանակելուց հետո համայքների ղեկավարների կողմից տրված օգնության հետքերով շարունակում են գնալ»:

Դատախության ներկայացուցիչը նախ նշեց, որ ծանոթ չէ այդ նյութին, իսկ ինչ վերաբերում է  մոտեցմանը՝ արդյոք դատախազությունը բոլոր այդպիսի դեպքերում դրսևորել է միանսական մոտեցում, թե ոչ, վստահեցնում է՝ դատախազությունը յուրաքանչյուր քրեական գործով համանման երևույթների նկատմամբ դրսևորում է  միասնական մոտեցում, այս դեպքում  դրսևորվել է նույնը:

«Այսինքն, անկախ ընտրական գործընթացի մեջ լինելու ժամանակահատվածից, քրեական գործերն ընթանում են իրենց բնականոն հունով, կատարվում են համապատասխան քննչական ու դատավարական գործողություններ»,- ասաց դատախազության ներկայացուցիչը: