Ձեր վստահելի աղբյուրը

«Դիմող կողմի բոլոր հրապարակված փաստերը, ներկայացված ապացույցները և հարուցապատասխանով բացահայտված բոլոր արատները փաստում են մեկ կարևոր բան՝ ընտրություններն անցկացվել են նախապես ծրագրավորված, կազմակերպված, պարբերական բնույթ կրող զանվածային  ընտրախախտումների հիմքի վրա»,- Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննությանն ընդմիջմանը լրագրողներին ասաց ՀՅԴ ԳՄ անդամ, «Հայաստան» դաշինքի անդամ Արծվիկ Մինասյանը:

Նրա խոսքով, արդյունքում ունեն նման խայտառակ ընտրական արդյունքներ, որոնք որևէ ձև չեն կարող արտահայտել հասարակության իրական տրամադրվածությունը։

«Բացարձակ կարևոր չէ տոկոսային ինչ հարաբերակցության մասին կարող է խոսք գնալ, այլ կարևորը այն է, որ իրականում հայ ժողովուրդը, ՀՀ քաղաքացիները թե մինչև նախընտրական շրջանը, թե նախընտրական շրջանում, թե ընտրություններից հետո բացարձակ չեն արտահայտվել այն պատկերը, ինչ արձանագրվել է իբև ընտրություններում»,- նշեց Ա. Մինասյանը։

Նա վստահ է՝ եթե  ՍԴ-ն լինի անաչառ, յուրաքանչյուր դատավոր առաջնորդվի իր երդմանն համապատասխան, ներքին համոզումով,  իրավունքի գերակայության սկզբունքով, պետք է անվավեր ճանաչվեն ընտրության արդյունքները։

Ա. Մինասյանը նշեց, որ Բարձր դատարանի համար հիմք պետք է հանդիսանա նաև  Սյունիքի համայնքապետերի կալանավորումները, որոնց հիմքում որևէ իրավունք, օրինականություն չկա, պարզապես անձանց վենդետան է, վրեժխնդրությունն է,  քաղաքական հետապնդումներն են: