Ձեր վստահելի աղբյուրը

Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննությունը «Զարթոնք» ազգային քրիստոնեական կուսակցության գործադիր մարմնի ղեկավար Արա Զոհրաբյան հետաքրքրվեց արդարադատության նախարարի  պաշտոնակատար Ռուստամ Բադասյանից՝ արդյո՞ք վստահում են Կենտրոնական ընտրական հանձնաժողովին, Սահմանադրական դատարանի:

Սակայն նախքան հարցադրումները, նա  հիշեցրեց, երբ «Քաղաքացիական պայմանագիր» կուսակցությանը եկել է իշխանության, անմիջապես հայտարարել էր, թե ինչ են անելու, որ համակարգը փոխվի, ընտրությունները կեղծելու, այլ արատավոր երևույթների նկատմամբ կասկած չլինի, մարդիկ  վստահ լինեն, որ պետք է լավ ընտրություններ անցկացվեն:

«Այն, ինչի մեջ դուք վտանգ եք տեսել, այդ վտանգավոր երևույթները վերացե՞լ են, թե՞ ոչ»,- հարցրեց Արա Զոհրաբյանը:

Ռ.Բադասյանն ասաց, որ կառավարության ծրագիրն իրականացվել է որոշակի փոփոխական հաջողություններով. «Նկատի ունենալով համավարակը, պատերազմը, դրանց հետևանքները՝ ոչ բոլոր  գործողություններն ենք հասցրել իրականացնել»:

Արա Զոհրաբյանն արձագանքեց. «Այն իրավիճակը, որ դուք նկարագրել եք, հիմա այդ իրավիճակի մեջ ենք: Այսինքն մենք մտել ենք մի համակարգի մեջ, որը չի բարեփոխվել, ձեր նախանշած խնդիրները չեն լուծվել: Բնական է, որ մեզ մոտ ակնկալիքը և մեր պահանջը  այդ խնդիրներով պայմանավորված ընտրությունների արդյունքներն են»:

Արա Զոհրաբյանը հիշեցրեց, որ Նիկոլ Փաշինյանի խոսքերը, որ 1995 թվականից հետո մինչև 2018 թվականը, միայն բացառություն է արվել 1999 թվականի ընտրությունները, չեն արտահայտել ժողովրդի ազատ կամքը:

«ԿԸՀ-ն կազմված է 7 անդամից: Ինձ հետաքրքրում է «Քաղաքացիական պայմանագիր» կուսակցության  դիրքորոշումը ԿԸՀ վերաբերյալ: ԿԸՀ նախագահ Տիգրան Մուկուչյանը 1996-1998 թթ. եղել է  հանձնաժողովի անդամ, 2011 թվականից առ այսօր հանձնաժողովի նախագահն է, Լաուրա Գալստյանը,  Արմեն Սմբատյանը,  Սիլվա Մարկոսյանը,  Գեորգի Մարտիրոսյանը ԿԸՀ անդամ են 2011-ից, Նունե Հովհաննիսյանը՝ 2014-ից,  Սեյրան Շահսուվարյանը՝ 2016-ից:

Ինձ հետաքրքրում է՝ ինչո՞վ է պայմանավորված ձեր ներկայիս վստահությունը ԿԸՀ նկատմամբ, երբ ձեր քաղաքական ուժը չի ընդունել նախորդ ընտրությունների արդյունքները, դրանց վերաբերյալ շատ կոշտ վերաբերմունք է արտայատվել: Ի՞նչն է փոխվել»,- հարցադրումներ արեց Արա Զոհրաբյանը:

Ռ. Բասադյանն արձագանքեց. «Բարձր դատարան, կարծում եմ՝ մենք քաղաքական ելույթները, քաղաքական գնահատականները պետք է հստակ տարբերականք իրավական գործընթացներից և իրավական գնահատականներից:

Նախ ընտրությունների կեղծման հետ կապված քաղաքական գնահատականը երբ տրվում է՝ հիմք ընդունելով որոշ հանգամանքներ, փաստեր, իրադարձություններ, պետք է նկատի ունենալ, թե  ինչ ընտրական համակարգ է գործում Հայաստանում:

ՔՊ-ն, երբ նոր էր ձևավորվում որպես կուսակցություն, հստակ ամրագրել է, որ ընտրությունների կեղծման դեմ պայքարելու թիվ մեկ գործիքը տեղամասային հանձնաժողովներում ունենալ վստահված անձինք, էլեկտրոնային համակարգ,  պետք է տեղամասում արձանագրել բոլոր խախտումները, օգտագործել բոլոր իրավական գործիքները: Բնականաբար, տեղամասից դուրս տեղի ունեցող ընտրախախտումներն ավելի բարդ հայտնաբերելի են, պետք է ունենալ ինստիտուցիոնլ քաղաքական կառուցվածք, որպեսզի հնարավոր լինի պայքարել ընտակեղծարարության մեխանիմզների դեմ: Հետևաբար, քաղաքական գնահատականները, որոնք հիմնված են որոշակի փաստերի վրա, պետք չէ շփոթել իրավական պրոցեսների հետ, իսկ  ԿԸՀ գործունեությանը գնահատական է տրվել ԵԱՀԿ/ԺՀՄԻԳ դիտորդական առաքելության կողմից՝ իր աշխատանքը կատարել է թափանցիկ, կոլեգիալ, մասնագիտորեն, վայելել է ընտրական շահառուների  վստահությունը»:

Արա Զոհրաբյանը հստակ հարդացրում արեց. «Ճիշտ հասկացա ձեզ՝  դուք վստահում եք ԿԸՀ-ին»:
Արդարադատության նախարարի պաշտոնակատարը պատասպանեց. «Այս գնահատականից հետո  ինչպե՞ս չվստահենք»:

«Վստահո՞ւմ եք սույն գործը քննող Սահմանադրական դատարանի՞ն, թե՞ ոչ»,- հարցրեց «Զարթոն» կուսակցության ներկայացուցիչը:

«Այո»,- պատասխանեց Ռուստամ Բադասյանը: