Ձեր վստահելի աղբյուրը

Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննությանը ՍԴ դատավոր Վահե Գրիգորյանը «Պատիվ ունեմ» դաշինքի ներկայացուցիչ Դավիթ Հարությունյանից հետաքրքրվեց՝ այն Կենտրոնական ընտրական հանձնաժողովը, որն այսօր գործում է Հայաստանում, բավարար անկախությա՞մբ է գործում։

Դավիթ Հարությունյանը կարծիքով, այն հարցերը, որոնք բարձրացրել են ԿԸՀ-ում ու այսօր բարձրացնում են ՍԴ-ում, շատ լավ գիտակցում էին, որ ԿԸՀ-ն այդ հարցերին չի կարող անդրադարձ կատարել ու պատճառն ամենևին անկախության բացակայությունը չէ։

«Կենտրոնական ընտրական հանձնաժողովը, իմ կարծիքով, գործում է պատշաճ, բայց այն հարցերը, որոնք մենք ներկայացնում ենք ձեր դատին, այդ հարցերը եթե ԿԸՀ-ն որոշում կայացներ, ես կարծում եմ, այստեղ մենք իրավական առումով կունենայինք ակնհայտորեն բաժանում երկու բանակի. մի բանակը վստահաբար կասեր՝ այո, իրավունք ունեն, մյուս բանակն էլ կասեր՝ ոչ, իրենք ներխուժեցին մեկ այլ մարմնի տիրույթ:

Սա իսկապես սահմանային խնդիր է: Այն հարցերը, որոնք բարձրացրել են ԿԸՀ-ի առջև, կարծում եմ, ավելի շատ հենց ՍԴ-ի լուծման խնդիրներ են», - ասաց Դ. Հարությունյանը։

Նա նշեց, որ սուբյեկտիվ պահեր չի տեսնում Կենտրոնական ընտրական հանձնաժողովում, ավելին, կարծում է, որ ԿԸՀ-ն հնարավորություն է ընձեռել շատ կարճ ժամանակահատվածում անցնել նոր համակարգի, տեխնիկական համակարգի, որը էական փոփոխություն մտցրեց ընտրությունների վերահսկման մեջ:

«Ես այստեղ այս պահին նման խնդիր չեմ տեսնում, դրա համար դիմումի մեջ նման խնդիր չեմ բարձրացրել։

«Շնորհակալ եմ, կարևոր արձանագրում էր», - ասաց Վահե Գրիգորյանը։