Ձեր վստահելի աղբյուրը

Աֆղանական «Թալիբան» արմատական շարժումը կտրուկ դեմ է արտահայտվել Աֆղանստանում Թուրքիայի ռազմական ներկայությանը:

«Թուրք կառավարիչների հայտարարությունը շարունակել իրենց ագրեսիան մեր երկրի դեմ Միացյալ Նահանգների խնդրանքով և որոշմամբ` մեր մեջ ատելություն և թշնամանք է առաջացնում և վնասում է երկկողմ հարաբերություններին», - ասված է շարժման՝ այսօր տարածված հայտարարությունում:
Թալիբանի առաջնորդները նշում են, որ «Աֆղանստանում օտարերկրյա ուժերի ներկայությունը, անկախ երկրի անվանումից, ագրեսիա է»: Այս մասին գրում է swissinfo-ն։

Նրանք հիշեցնում են, որ Աֆղանստանից բոլոր օտարերկրյա զորքերը դուրս բերելու որոշումը «կայացվել է ՄԱԿ-ի կողմից վավերացված և աշխարհի կողմից ճանաչված Դոհայի համաձայնագրի հիման վրա»:

2020 թվականին Դոհայում ԱՄՆ-ը և «Թալիբան»-ը (արգելված է Ռուսաստանի Դաշնությունում) կնքեցին խաղաղության համաձայնագիր, որը նախատեսում է 14 ամսում Աֆղանստանից օտարերկրյա զորքերի դուրսբերումը և միջաֆղանական երկխոսության սկիզբը:

Թալիբանի ղեկավարության կարծիքով՝ «Թուրքիայի իշխանությունների որոշումը անլուրջ քայլ է և հակասում է մեր ազգի ինքնիշխանությանը, տարածաշրջանային անվտանգությանը և ազգային շահերին»:

«Մենք չենք խառնվում ոչ մեկի գործերին և թույլ չենք տա որևէ մեկին խառնվել մեր գործերին», - ասված է հայտարարության մեջ:

Թալիբները նախազգուշացնում են Թուրքիայի իշխանություններին «հետևանքների համար պատասխանատվության» մասին, որոնք կրելու է Անկարան, եթե չհրաժարվի իր մտադրությունից:

Հիշեցնենք, որ այս տարվա մայիսին ԱՄՆ-ի և Թուրքիայի նախագահներ Ջո Բայդենը և Թայիփ Էրդողանը համաձայնության եկան, որ Աֆղանստանում ՆԱՏՕ-ի առաքելության ավարտից հետո Քաբուլի օդանավակայանի անվտանգության ապահովման հարցում Թուրքիայի զինված ուժերը առաջնային դեր կխաղան:

Հունիսի վերջին Թուրքիայի պաշտպանության նախարար Հուլուսի Աքարը հաստատեց Քաբուլի օդանավակայանի անվտանգությունն ապահովելու պատրաստակամությունը՝ համապատասխան պայմանների առկայության պայմաններում: